Shillong, Jylliew 21: Ka Central Bureau of Communication (CBC), Shillong, ha ryngkat ka jingiatreilang bad ka Bharat Seva Ashram Sangha, Shillong, ki la rakhe ia ka International Day of Yoga (IDY) 2026 da kaba pynlong ia ka jingleh yoga paidbah ha jaka jong ka Bharat Seva Ashram Sangha, Jail Road, Shillong, mynta ka sngi.
U Additional Director General, North East Zone, ka tnad Information and Broadcasting, u Kripa Shankar Yadav, u la ïadonlang ha kane ka jingrakhe bad ïashim bynta ha ki yoga asana bapher bapher bad ki rukom pynhiar bad ring mynsiem ryngkat bad ki ophisar, ki nongtrei, ki nongtrei mon sngewbha jong ka sangha, ki samla pule bad ki riew paidbah.
Ia kane ka prokram la pynlong kum shi bynta ban rakhe ia ka International Day of Yoga ha ka ri baroh kawei, kaba ju rakhe man la u snem ha ka 21 tarik Jylliew ban kyntiew ia ka jingkoit jingkhiah ha ka met ka phad, ka bor pyrkhat bad ka mynsiem lyngba ka jingleh yoga.
Haba ai jingkren ha ka jingïalang, u Yadav u la kren shaphang ka jingdonkam jong ka yoga kum ka jingai kaba iaineh jong ka India sha ki briew bad u la ban jur ïa ka jingkiew ka jingpdiang ïa ka ha kylleng ka pyrthei kum ka lad ban ïoh ïa ka koit ka khiah bad ka bha ka miat kaba pura.
U Yadav u la pynpaw ka jingkmen ban sakhi ïa ka jingïashim bynta radbah jong ki briew ha baroh ki rta, naduh ki khynnah rit haduh ki riew tymmen. U la ong ba ka yoga ka dei ka jingleh ka bym sahkut ha tang kano kano ka rta ne ka tynrai, kaba ai jingmyntoi ia baroh bad kaba wanrah ia ka bha ka miat ia baroh.
Ia kane ka jinghikai yoga la pyniaid da ka nonghikai yoga ka Aparajita Das, kaba la pyni ia ki nongiashim bynta lyngba ki yoga asana bapher bapher, ki pranayama bad ka jingpyrkhat jylliew katkum ka Common Yoga Protocol.
Ki nongmihkhmat jong ka Bharat Seva Ashram Sangha ki la ban jur ia ka jingdonkam jong ka yoga ha kaba kyntiew ia ka jingryntih ha ka jinglong, ka jingsuk mynsiem bad ka jingkiew ha ka jingngeit.
Ki la pyntip ba ki dkhot bad ki nongtrei mon sngewbha jong ka Sangha ki ju leh yoga man ka por bad ba ka Sangha ka ju pynlong ïa ki jinghikai yoga man ka por na ka bynta ki dkhot jong ka bad kumjuh ruh na ka bynta ki paidbah.
Ia kane ka jingialang la pynkut da ka jingai khublei bad ka jingbam smai lang na ki nongiashim bynta ban bteng ia ka jingleh yoga man ka por bad ban kyntiew ia ki jingmyntoi jong ka hapdeng kiba haiing hasem, ki paralok bad ki shnong ki thaw.
