Shillong, Ka Dorbar u Syiem Hima Mylliem, hadien ka jinglap ba dang don ba pynlong ia ki Dukan, ki Basa ne Godown ha lewduh kum ka jaka sahmiet wat hadien ba la pynmih ĩa ka jingpynbna na ka por sha ka por la shem ba dang don kiba ialeh pyrshah.
Ki dang don kiba pynlong ia ki Dukan, Basa ne Godown jong ki kum ka jaka khalai bad Die Kyiad be-aiñ bad sahmiet kaba la wallam ĩa ka jingisait-met ia ka jinglong kyrpang jong ka lewduh kaba long ka lew kaba heh duh ha Ri Khasi Jaiñtia.
Kane ka Dorbar u Syiem Hima Mylliem da ka jingsngewkhia bad ka jingkitkhlieh na ka bynta ka jingbit jingbiang jong ka lewduh da kane la khang pyrshah ia ka jingsahmiet bad ka jingdie kyiad bad khalai be-aiñ ha lewduh.
Na ka liang ka kala pynmih ia ka hukum ba ka por ban khang noh ĩa baroh ki Dukan, Basa Godown kan long 10:00 baje da miet bad ruh la bthah ia ki trai Dukan, Basa, Godown ha lewduh ba kin wan register īa ki Dukan, Basa, Godown jong ki la ki shnong hi ne aiwai shawei pat bad ki jait jingdie jingthied aiu khnang ba kane ka Dorbar kan ioh ban buh beit buh ryntih.
