Shillong, Iaiong 23: U Myntri rangbah ka jylla u Conrad K Sangma u la pynrem jur ia ka jingjia ha Rongmil ha ka 17/Iaiong/2024 ha East Garo Hills District ha kaba lai ngut ki briew kila shah thang im bad u pynpaw ia ka jingsngewsih ka jong u ha kum kine ki jingjia ki jia.
Ki lai ngut kiba la shah thang im haduh ban da iap bad kawei ka kali ki briew ki dei na jylla Assam, u myntri rangbah u la ong ba kum kine ki jingjia yn nym lah ban pdiang da lei lei ruh bad u la pynrem jur ia kito ki nongleh kam sniew bad kane ka dei ka jingpynkhein ia ka long briew man briew.
U Myntri Rangbah ka jylla Meghalaya u kyntu ia ki paidbah nongshong shnong jong ka jylla Assam bad Meghalaya ban kiar na kano kano ka jingia leh kaba mar kynti, ai ba kane ka mynsiem jingiashun kan nym shong ha ka dohnud jong ki briew.
Ha ka juh ka por la kyntu ban nym ai lat lada don mano mano ban shim kabu ban pynsiew shuh shuh ia kane ka jingjia ban wanrah ia kata ka jingiapher jaidbynriew da kaba pynsaphriang ia ki khubor lamler.
Ki bor jong ka ain na ka liang jong ka jylla Meghalaya kila leh ia kaba don kam ban thwet ia ki nongleh kam sniew bad na ka liang jong u myntri rangbah ka jylla u ai ka jingkular ba ia kito riew sniew yn sa pynshitom katkum ka ain.
Ha kane ka por ka long kaba don kam ban pynneh pynssah ia ka shnong suk shongsain, ka jingbishar bad ki ain kiba don kin sa leh ia kaba don kam, ha ka juh ka por phah ia khubor sngewlem sha kiba ha iing ha sem kiba mat ia kane ka jingjynjar bad jingsngewsih bad u khmih lynti ba ka jingshong suk shongsain kan don.
