Shillong, Iaiong 20: U nongialam ka party BJP u Anil Antony ba bat kum u State Prabhari u la wan sha kane ka nongbah Shillong ban pynshai ia ka bhah seat kyrpang ha iing dorbar bah jong ka Ri India ha Parliament ia kaba la tip kum ka “Women Rervation Bill ia kaba ym shym la lah ban pass hapoh iing dorbar na ka daw ba ki liang pyrshah ka Congress, TMC, DMK bad Samajwadi party kim shym la kyrshan ia kane ka Bill kumta ym shym la lah ban pdiang iaka.
Haba kren ha ki lat pathai khubor ha ophis jong ka BJP u Anil u la ong ba ka ri kala shakhi ia kaei kaba jia ha ka 16, 17 bad 18 tarik mynta u bnai Iaiong 2026 ia kaba la khot ia ka jingiashong dorbar ba kyrpang jong ka Parliament, ha kane ka jingshong dorbar ka sorkar pdeng kala wan rah lai tylli ki bill, ka Constitution (131st Amendment) Bill, ka Delimitation Bill, bad ka Union Territories Laws (Amendment).
Ia kine ki bill la wanrah hapoh ka iing dorbar da u myntri ranbah duh jong ka ri bad ka jingthmu ba ynsa lah ban pdiang hapoh ka iing dorbar ia ka Women Reservation Bills, ha kaba don palat ia ka 50% na ki nongshnong shnong ka Ri India ki dei ki kynthei ba kin ioh ia ka bhah kaba dei ka jong ki ha ka synshar paidbah.
Hynrei ha kine ki ar sngi jong ka jinhiashong dorbar ka kynhun India Alliance kaba la ialam da ka Congress Party, ka Samajwadi party, ka TMC, ka DMK kim shym la kyrshan ia kane ka bill bad ka bill kaba la wanrah da u myntri rangbah duh jong ka ri da ka jingthmu ban plie ka lad ia ki kynthei ym shym la lah ban pynurlong.
Kum kane ka jingjia kam dei ka sien kaba nyngkong, ia kane ka bill la wanrah nyngkong ha u snem 1996 ha ka sorkar jong u HD Deve Gawda ha kaba ka congress ka ai ka jingkyrshan na shabar ia ka sorkar kim shym la kyrshan ia kane ka bill, 2003 ka sorkar u Atal Bihari Vajpayee la wanrah ia kane ka bill, namar don kam 2/3 kyrshan ha baroh ar tylli ki parliament ka Congress kam shym la kyrshan ia kane ka bill.
Ha u snem 2010 ha ka sorkar UPA bala ialam da ka seng Congress ka BJP kala kyrshan ha Rajya Sabha ia kane ka bill hynrei ka congress ha kato ka por kam shym la wanrah hapoh Lok Sabha wat la ka shongknor ka UPA dei ka kynthei ka Sonia Gandhi hynrei kim shym wanrah ha Lok Sabha.
Ha dien ka 2023 ba ka sorkar NDA ka ioh ia ka jingbun paid kala pass ia kane ka bill ha kaba ka congress kam don lynti ka kyrshan ia ka, hynrei namar kane ka bill ka don ka jingiadei bad ka jingphiah konstitwensi thymmai bad ka jingthoh khanasamari kaba dang iaid mynta bad la wan rah ia kane ka bill khnang ba yn lah ban pyntrei kam ha u snem 2029.
Hynrei kane ka kynti kaba mynta ka India Alliance kaba la ialam da ka Congress kim kyrshah ban pynthikna ba kane ka bill kan nym lah ban pdiang ha Parliament. Naka liang jong ka BJP ka pynrem jur ia ki party kiba pyrshah ia kane ka bill ban ai bhai a ki kynthei ha ka synshar paidbah.
