Shillong, Lber 16: Ka High Court jong ka jylla Meghalaya mynta ka sngi kala pynmih ia ka rai ba dei ban pynsangeh shuwa ia ka ilekshon ban jied Chairman bad CEM hapoh jong ka KHADC katkum ka jingpynbna kaba la pynmih ha ka 13 tarik mynta u bnai.
Katkum katei ka jingpynbna ha ka 13 tarik kaba la mih na ka secretariat jong u Lat ka jylla ka long ba ia ka ilekshon Chairman la buh ban long ha ka 17 tarikb ad ia ka ilelshon jied CEM la buh ban long ha ka 18 tarik mynta u bnai.
Kane ka hukum kaba la pynmih da ka iing kashari mynta ka sngi ka long halor ka jingmudui jong u Bah Pynshngianlang Syiem pyrshah ia ka secretariat jong u Lat ka jylla Meghalaya mynta ka sngi. Ka iing bishar kala buh sngi ban shim bishar biang ia kane ka mutkoduma ha ka 19 tarik mynta u bnai.
Ha kane ka hukum kaba la pynmih la bthah ba ia ka jingpynbna kaba la pynmih a ka 13 tarik dei ban pynsangeh shuwa namar ba ia kane ka mukotduma yn dang shong bishar ha ka 19 tarik mynta u bnai, la bthah ia baroh ba ki dei ban but ia kane ka rai ha dien ba la ioh ia ka kotpi na iing bishar.
Na ka liang jong u nong mudui ma mih khmat da u muktiar K Paul bad u S. Thapa bad na ka liang jong ka secretariat jong u Lat ka jylla la mih khmat da u muktiar S Sen bad u Muktiar A. Thungwa.
Ha ka jingmudui hapoh iing bishar u muktiar K Paul u la pynsngew ba ia ka jingmudui la leh katkum ka riti synshar jong ka Ri kaba 226 ban ujor pyrshah ia ka jingpynbna kaba la mih 13/03/2020 kaba la pynmih na ka ophis jong u Commissioner secretary jong ka sorkar Meghalaya ba dei peit ka tnad District Council Affair bad na ka ophis jong u Secretary jong ka KHADC.
Da ka jingpynbna kaba nungkong ka long ba u Lat jong ka jylla u ka khot ban pynlong ia ka dorbar jong ka KHADC ha ka 17 tarik ha ka por 10.00 baje mynstep hapoh hong ka District Council Hall ban jied ia u Chairman jong ka Council bad ka jingpynbna kaba ar ka long ban khot ia ka iing dorbar ban pynlong ia ka ilekshon jied CEM ha ka por 11.00 baje mynstep ha ka 18 tarik.
Ha jingmudui na ka liang jong u nongujor u la ong ba u bat ia ka kam Chairman hapoh ka iing dorbar jong ka KHADC dei da ka jingjied lyngba ka ileskhon. Kumba ka long mynta katei ka shuki kam shym lait thylli, da ka jingpynbna kaba nyngkong ka long ba la weng ia u Chairman ka kam.
Katba na ka liang jong u muktiar S Sen u la pynsngew hapoh ka iing bishar ba u hap ban shim ia ka jingbthah na ki bor ba dei peit bad un sa ai ia ka affidavit ban jubab lada don kam, halor kane ka iing bishar kala pynkynriah ia ka jingbishar sha ka 19 tarik mynta u bnai.
Ka iing bishar kala hukum ba haduh ban da shong bishar biang ia ka jingpynbna kaba la pynmih ha ka 13.03/2020 dei ban pynsangeh noh shuwa bad la bthah ia baroh kiba dei ban but ia kane ka jingbthah.
