Shillong, Lber 03: Ka skul bah North-Eastern Hill University (NEHU) ka pynpaw ia ka jingsngew sarong ba ha ka jingiakop tyrko ki skul bah kaba la long ha Delhi kala rah ia ka nam lahduh ha kane ka jingiakop, ia kaba la mih khmat da ka samla Euvelin Suchiang bad u samla Toniho S. Kharsati na ka tnad pule ain.
Kane ka jingiakop ia tyrko kaba la tip kum ka “Sat Paul Mittal National Inter-University Debate Competition” iakane ka jingiakop la pynlong ar sngi lynter ha ka 1 bad 2 tarik mynta u bnai Lber ha IAPPD Auditorium, New Delhi, ha kane ka ia kop hapdeng ki skul bah ka Ri India.
Ka samla Euvelin Suchiang ka jingdon ia ka sap kaba kyrpang ban kren kala ioh ruh ban rah ia ka khusnam ha ka kyrdan kaba ar kum ka nongkren kaba tbit tam bad kane ka pyni ba ka skul bah NEHU kam don jingpher na kiwei ki skul bah.
Ha kane ka jingleit la ialam hapoh ka jingpeit jong Dr.Chandra kanta, na ka tnad pule Geography, kum ka nonghikai ban peit ia kane ka kynhun bad ki nongbsihar kila shoh biej ia ka jingtbit ki samla pule jong ka NEHU.
Ia kane ka jingiakop tyrko “Sat Paul Mittal National Inter-University” la pynlong da ka Indian Association of Parliamentarians on Population and Development (IAPPD), New Delhi, da ka jingthmu ban kyntiew ia ka jingshemphang bad ban iarap ia ka rukom ia kren hapdeng ki samla pule.
Haba ia dei bad kane ka jingjop kaba khraw u Prof. R. L. Nongkhlaw, u ba dei peit ia ki samla pule hapoh katei ka skul bah u la ai khublei kyrpang kane ka kynhun kaba la wanrah ia ka jingjop bad kane ka kren ia ka jingleh ka skul bah.
U Prof. Prabha Shankar Shukla, Vice-Chancellor ka NEHU, u la ai ka jingiaroh kaba kyrpang ia ka samla Euvelin Suchiang, bad ia u Samla Toniho S. Kharsati, bad Dr.Chandra kanta kiba la rah nam ia ka skul bah bad kane ka jingjop ka dei ka thong jong ka skul bah ban kyntiew ia ka shajrong ha baroh kiliang.
