Shillong, Nailar 13: : Ki nongsiat khnam kynthei bad shynrang jong ka South West Khasi Hills Distrct, kim lah ban khlem da shad kmen ban ia risa bad kynhoi hadien ba ki la ioh ba kin bat ia ka kyrdan ba halor duh ka miej khur takma, ha ka sngi kaba kut noh artad ka klympung iakob siat khnam ba la tip ia ka kum ka Meghalaya State Archery Championship 2026.
Ha kane ka kynti kumba 200 ngut ki khynnah bad kumjuh ki samla na ki 12 tylli ki district ka jylla, ki la poi ba kin ia lum klang ban ia mih madan ban iakhun ia kane ka jingiakob, kaba la pynlong ia ka ha ki lai sngi ha madan jong ka SAI, STC, NEHU.
Ha kaba kut ka jingiakob, ka kynhun ka SWKHD ki la ioh ba kin khur 8 tylli ki takma ksiar, 10 tylli ki takma rupa bad 7 tylli ki takma rnong bad haba khein lang baroh, ki la ioh ba kin khur 25 tylli ki takma.
Ka jinglah ban ioh khur ki nongialehkai ka SWKHD ia kine ki tama ka dei hadien ba ki nongialehkai ki jong ka, ki la lah ban paw bad ialehkai bha naduh hynnin ka sngi kaba ar ha kaba ki la lah ban bat ia ka kyrdan ba nyngkong ha ka jingiakob jong ka Indian Round, bad ban bynrap da ka jinglah ban ialehkai bha sa ha ka compound bad kumjuh ha ka liang ka recurve.
Katba ka kynhun ialehkai ka East Khasi Hills, dei tad haduh hynne ka sngi kaba lai bad ba khatduh ba ki la lah ban khie khlieh na kane ka jingiakob ban kiew joit sha ka kyrdan kaba ar hadien ba ki la ioh ba kin khur mar 7 tylli ki takma ksiar bad rupa bad 4 tylli ki takma rnong bad baroh ki long 18 tylli.
Katba ka West Khasi Hills ka la bat ia ka kyrdan kaba lai hadien ba ka la ioh ba kan khur mar 6 tylli ki takma ksiar, rupa bad rnong, bud pat sa ka Ri-Bhoi kaba bat ia ka kyrdan ba saw (4 ksiar, 2 rupa, 4rnong), katba ka East Jaintia Hills (3 ksiar, 3 rupa bad 3 rnong) ki bat ia ka kyrdan ba san, da ka jinglah ban tam tnoit tang da kawei ka takma rupa ia ka East Garo Hills (3 ksiar, 2 rupa bad 3 rnong) ban bat ia ka kyrdan ba hynriew.
U kongsan uba la wan ban don lang bad ban sakhi pura ia ki phainal jong kane ka jingiakhun dei u bah Wailadmiki Shylla, Myntri ba dei khmih ia ka tnat Sports & Youth Affairs ka sorkar jylla, uba la pynlut lai kynta ka por kaba kordor ka jong u ban khmih ban sakhi ia ki phainal jong kane ka lympung.
Haba kren kum u kongsan, u bah Wailadmiki u sngew kmen ba un shem bad iohi ba kane ka lympung iakob kam dei kaba noh shilliang, hynrei jan na baroh ki district kiba la poi ban iashim bynta ki la ioh ba kin khur ia la ki takma ki jong ki, kaba hangne um lah ban khlem da ai khublei ia ka Archery Association of Meghalaya, ia ka jingtrei borbah ka jong ka ban kyntiew bad sei ia ka sap siat khnam ba nylla ki khynnah bad samla, nalor katta u pyrto ruh ia ka AAM, kaba long ka synjuk kaba trei shitom ha ka liang ka jingpynkhreh ka jong ka ia la ka kynhun kaban sa iakhun ha ka lympung 39th National Games 2027 ban sa long ha kane ka jylla.
Nalor katta u bah Wailadmiki Shylla, um lah ban khlem da pyrto ia u Myntri Rangbah ka jylla u Conrad K Sangma, uba la shim khia ban buh syndon da ka thong ban pynkylla ia ka kam ialehkai (sports) hangne hapoh ka jylla. Kaba ha kine ki 7 snem ba la leit ka mang tyngka sha ka tnat Sports and Youth Affairs ka la kiew na ka 70 klur tyngka sha ka 844 klur tyngka, nalor katta u la ieng ban pynkynmaw ia ki nongwan iashim bynta ba ka sorkar jylla ka la prat lynti da kawei ka thong bad katta ka long ka lad ban ioh kam ioh jam ia ki nongialehkai kiba lah ban ioh khur ia ki takma na kino ma kino ki jait jingialehkai ka jong ki.
Kaba kham sngewtynnad ban iohsngew na ka jingkren ka jong u bah Waildmiki ka long na ka 1st Khelo India Tribal Games, kaba ha kane ka lympung ka Meghalaya ka la lah ba kan ioh bat ia ka kyrdan ba 13 kaba kum ka jylla kan dang iai buh shuh shuh ia ka thong ba ha ki san snem ban wan kan lah ban nang kham kynjoh sha ka thong kaba san.
Kaba dei ha kum kane ka lympung ba ka kynhun siat khnam ka jylla ki la ioh ba kin khur 2 tylli ki takma ksiar bad kawei ka takma rnong. Ki kynrem ki lyndan kiba la wan ban ia sakhi lang ka kynthup ia u General Secretary ka Meghalaya State Olympic Association u bah Finely L. Pariat, Joint Secretary P Laloo ryngkat ki nongialam bad ki dkhot ka AAM.
