Shillong, Iaiong 30: Ban ialeh pyrshah ia ka Soskular kaba la iasoi hapdeng ka sorkar Meghalaya bad sorkar Assam ha kaba ia dei bad u pud u sam ki kynhun bapher bapher, kynthup ia ki Hima, ki shnong kila thaw ia kawei ka kynhun kaba la tip kum ka Joint Action Committee Border of Meghalaya (JACBOM) ha ka jingialang kaba la long ha Shillong Club Mynta ka sngi.
Kane ka jingialang kaba la long mynta ka sngi ka long ban jied ia ki nongkit kam jong ka kynhun bad shuwa ban jied ia ki nongkit kam la kren shai ba yn nym sha iano iano ban jied ban long ki nongkit kam lada ki don ka jingiadei bad kano kano ka seng sain pyrthei, halor kane ka nongrim u bah Erwin K Syiem Sutnga u la pynbna ba la resign noh na ka party Congress bad sa jied ia u kum u shongknor ka JACBOM.
Haba kren ha ki lat pathai khubor ha dien ka jingialang nalor u shngknor la jied ia u bah Rast Thabah kumu General Secretary, ia u bah Lamphrang Kharbani kum u Symbut Shongknor bad ia u bah Cahrlie Rani, synrap shongknor nalor jong ki la don kiwei kiwei ruh ki nongkit kam na ki khlieh nongsynshar shnong, ki seng bhalang bad ki nongkit kam shnong.
Haba jubab ia ki jingkylli haba ia dei bad ka kam pud u bah Erwin shongknor ka JACBOM la kren shai ba kum ka kynhun kam lah ban ujor sha iing bishar hyrei dei ki trai jaka kiba lah ban leh ia kane ka bynta, ia kane ka bynta ym pat lah ban ong ha kano ka rukom kin iaid nangne sha khmat.
Haba ia dei bad ka soskular u bah Erwin u la kynnoh ba ka dei ka jingbakla jong ka sorkar bad ia kane dei ban pynbeit, wat la ki ong ba ym lah ban pynkylla ia ka, kane ka soskular kam don nongrim ha khmat ka ain namar la dep ban pyntip sha ki Regional Committee ba ka don ka “Stay Order” ha ba ia dei bad ki jaka.
Hapdeng kine ki jingiakren khmih lynti ba ka sorkar kan pynjem ia u ksai bad ba kin plie ia ka jingkhang na ka bynta ban ia kren bad ia phylliew jingmut biang,namar ka sorkar jylla kam don jaka ki jaka hap ha ka jingpeit jong ki District Council.
