Shillong, 29 Nohprah: Ka Committee jong u Rupang ba ai jingiarap ia ki briew ba duk tam la py
nlong hynne ka sngi da kaba ai jingiarap da ki tiar ki tar sha kito ki briew ba duk ki bym shym la ithuh da ka sorkar.
Ia katei ka jingnoh synniang ai jingiarap sha ki briew ba duk lapynlong hynne ka sngi ha Mawkhar Christian haba la iadon ryngkat langda u President ka seng khasi seng kmie u Bah MF Blah, u Bah Jai Skhemlon bad kiwei kiwei de ki nong sakhi.
Ki hynriew ngut kiba shah jied ban ioh jingiarap na u komiti baduk tam jong u Rupang, ki long Kong Phildaris Longsiang na Khwad iba dei I khunswet ba don jingduna dkhot met, Kong Poska Diengdoh na Baniun ba la khlad noh u lok bad ri 5 ngut ki khun, Kong Jerimai Pathaw na Nongtraw, Marbisu ba shah ieh ha u lok bad hap ri saw ngut khun, Kong Minit Kharthangkhaw na Phansawrang iba ri da khun ksiew, Kong Jinpor Kurbah na Weilyngkut bad Bah John Rani ba dap 116 snem na Kutmadan, Sohra.
Ia kine ki briew kiba la jied kum kiba duk bad shem jingjynjar, la msam da ki tiar kum ka kombor, khiew, pliang bad kiwei. Ka pisa ba la iohlum da ka komiti ba duk tam jong u Rupang mynta u snem, ka la mih T. 24030 (arphewsaw hajar laiphew tyngka) ba la wan
noh synniang da ki briew ba la khia bad don mynsiem na ka bynta kiba duk.
Bun na kine kiba ioh jingiarap, ki dei kiba duk shisha bad kiba shem jynjar ha ka jingim jongki, kiba ka sorkar ka leh klet. U Bah MF Blah uba la long ruh kum u Kongsan u la ong ba iei iwei I jingai iba rit I dei iba iarap. “I jingnoh synniang barit I long kum I sharak rit”, la ong u Rangbah Blah.
U la ong ba kane ka jingleh jong u Rupang ka long ka jingkyrkhu shisha ia ki baduk bad u la kular ba lashem snem un iasnohkti lang ha kum kane ka jingthmu ba donkam jong ka kot khubor u Rupang. Shwa ia kane, u Bah Skhemlong u la ong ba kane ka jingthmu bad ka jingleh jong ka komiti jong u Rupang ka long kaba dei hok ban ioh jingiaroh. U la ong ba un iadon bynta lang lashem snem ha kane ka bynta kane ka jingthmu ba donkam.
Na ka liang u secretary ka komiti Babu Kular Khongjirem u la ong ba kane ka dei ka sien kaba lai ba ka komiti ka la pynlong ia kane ka jingiarap. U la iathuh ba ka jingwan noh synniang jong ki briew ka la nang kiew na ka snem kumba ka paw. Ha ka sien ba nyngkong, ka jingdon kiba wan noh sha ki lai ngut ki briew ha kaba ka jingdon kiba wan noh synniang ka long tang T. 4045 ha u snem 2011, ha u snem 2012, ka jingmih ka long T. 19000 bad la sam sha ki san ngut bad mynta u snem ka la long T. 24030 bad la sam hynriew ngut.
U la ong ba la jied ia ki briew da ka komiti da kaba leit peit ia ka iing ka sem, ka jinglong jingman jongki, bad kam ju shu jied kulmar tangba la ong mano mano hynrei ka komiti ka da peit bad bishar bniah khnang ba kiba ioh, ki dei hok shisha. Katba u trai ka kot Khubor Rupang, u Bah RM Shabong u la ai khublei ia kito baroh kiba don mynsiem ban ai jingiarap sha kiba duk bad kyrmen ba kin nang shlei bad nangbiang shuh shuh ha ki snem ban wan. Ia ka jingialang la pyniaid da u chairman ka komiti Bah Jied Kurbah.(SP News)
