Shillong, Naitung 16: Ki dkhot ka Federation of Khasi Jaintia bad Garo People (FKJGP) myngta ka sngi ka 16 tarik u Naitung 2024 ki la shah khot hajir ha ki pulit jong ka Nongmensong ki ba kynthup ia u bah Khrawkupar Nongsiej Chief Organiser. Ia u Bah Khrawkupar la wan ban synran da ki Nongialam ka Seng kynthup u President bad kiwei kiwei ki Nongialam ba hakhmat.
Ha ba ioh ban ia kren bad ki nongthoh khubor na ka liang u President ka FKJGP u bah Dundee C Khongsit u la buh jingkylli ba ba kumno ka Tnad Pulit ka khot hajir tang ia ki nongialam ka Seng, ki khlem iaid lait ia ka District Council, ka Tnad Labour, ka Tnad Food bad Safety.
U la ong ruh ba ki ophisar jong kine ki tnad kila ia donlang ha ka jingkhynra, hynrei shaei ki jah kine ki Ophisar ba khlem khot hajir lada ki Pulit ong ba ka jingleh jong ngi ka long kaba be-ain.
U bah khongsit u la ong ruh ba Ngim sngew phylla ia kane ka jingleh ki Pulit bad ka Sorkar hynrei kaba sngew thamula ka long ba lada ngi pyrshang ban tehlakam ia kata ka jingwan rung be-ain ki bar jylla, pynban ka Sorkar ka iada bad pynsajia ia ki dkhot Sengbhalang da kane ka lynti.
U la ong ruh ba Ngim don jingpyrshah iaki bar jylla ba kin wan bylla lada ngim pat don ki briew jong ngi kiba lah ban trei ia ki kam ba kin trei. Hynrei ka seng ka pdiang lada ki wan shane ban leh ia ki kam kaba ki paradoh parasam jong ki kim pat lah ban leh hynrei lada ki wan pat ki hap ban iaid pat kat kum ka ain.
U Bah Khongsit u la ong ruh ba Kum ki samla kiba don jingkitkhlieh ia ka Jaidbynriew, ngim lah ban shu shong kli kti lada ka Sorkar kam leh eiei ruh em ia kane ka kam iap kam im jong ngi kum ka Jaidbynriew.
Kum ban shu pynkynmaw ba ka seng FKJGP ka la leit ban khynra Licence ha ki thain jong ka Nongmensong ha ryngkat ka jingiadonlang ki Ophisar ka Khasi Hills Autonomous District Council (KHADC), ka Tnad Labour ka Sorkar Jylla lem bad ka Tnad Food & Safety ka Sorkar Jylla.
