Shillong, Lber 03: Ban pynpaw ia ka jingpyrshah ia ki ar ngut ki MLA, u bah Methodius Dkhar bad u bah Shangkliar Warjri kiba la jop ia ka elekshon na ka party HSPDP kiba la leit ban ai jingkyrshan ia ka sorkar ban ia lam da ka NPP, ki seng bhalang kiba la pynlong ia ka jingialang ha Motphran kila thang ia ka tyngshop jong kitei ki MLA.
Ha kane ka jingialang paidbah ki katto katne ki nongialam jong ki seng bhalang kiba la kren kila pynpaw ia ka jingsngew pyrshah ia kane jingleh jong kitei ki ar ngut ki MLA bad ki kyntu ia ki ba kin wan phai ban ioh ia ka sorkar kaba thymmai lait na ka NPP.
Kiba la kren ha kane ka jingalang ki long u bah Erwin K Sutnga, bah Donbok Dkhar President ka HITO, bah Donboklang Kharlyngdoh Vice President HYC seng kmie, bah Banshai Marbaniang, u President ka MPSO, bah Thomas Passah, Kong Puriti Phawa, bah Roykupar Synrem General Secretary ka HYC, kine baroh kila pynpaw ia ka jingsngew pyrshah ia ka jingleh kitei ki MLA.
Haba ia dei bad ka jingkren jong u bah Prestone Tynsong, u nongialam ka HITO la ong kila mih paidbah ban ialap pyrshah ban pynrem ia kane ka sorkar, ha ba ia dei bad ka jingong ba la bthah ia ki bor jong ka ain ban peitngor la ong ba kan bha ban pynheh lypa ia ka jail. La ong ba ka NPP bad ka BJP ruh dei ki juh.
