Shillong, Nailar 30: Mynta ka sngi 30/08/2023, ka KSU Narpuh circle hapoh ka jingialam u bah KS Suchiang President, ki dkhot lem bad katto katne ngut ki nongialam napoh District unit ki la leit ban buh da ka ejahar( FIR) hapoh ka SP Office ban pynshitom ia ki pulit kiba don kti ban shoh briew ha ka Public hearing jong ka Meghalaya Cement Ltd, Thangskai kaba dang shu dep long shen kata ha ka 24/08/2023.
Ia ka “First Information Report” la ai ha u SP East Jaiñtia Hills District. Lah ban pynkynmaw ia ka jingjia ha katei ka sngi ba ki pulit ki la shoh bad kawang lathi khlem jingmap wat ia ki kynthei khynnah ruh.
Kat kaum ka hok longbriew man briew (Human Rights) ym lah satia ban pdiang ia kane ka jingleh riewkhlaw ki briew ba bat ia ka aiñ. Ka aiñ ka dei ban pynshitom ia baroh kito kiba don kti, ka aiñ kam dei ban theh shiliang, ka dei ban long mar katjuh la uba rit ne ba khraw.
Ym da donkam than ban batai namar la sakhi ha ki social media kaba la saphriang kylleng kylleng. Ka seng ka pynrem ruh ia ki MLA jong ka thaiñ kiba sngap jarjar khlem kren eiei ban iada ia ki paidbah lane ban dawa ia ka hok jong ki paidbah kumba ki kren kop ha ka por ba ki ialap elekshon ban iadon ryngkat bad u paidbah lada ki shah thombor pyrshah ia ka hok jong ki.