Shilllong, jymmang 06: Hadien ba ka National Khasi Union (NKU) kala trei shitom ban buddien ia ka rukom sam jingbam na ki tnad Supply jong ka jylla ha man la ka district da kaba pan jingtip lyngba ka RTI na ka tnad Supply jong ka jylla haka ba ia dei bad ka jingsam ia ki jingbam sha ki paidbah , ki nongialam ka NKU kim shem la shong kli kti bad ki la bteng ban rung sha man la ka District na ka bynta ban wad ia ka jingshisha la ki paidbah ki ioh ne em ia ka hok kumba la mang da ka sorkar.
Ka NKU mynta ka sngi ha ak jingialam jong u Presdient u Samla Sylvanus Malai ki la leit ban ia kynduh ia ka Deputy Commissioner ka Ri-Bhoi District na ka bynta ban wad jingtip halor ka jingdon jong ki 12 tylli ki Chakki Mill ha ka District ba la pyntreikam na ka bynta ban tylliat Ata, hynrei namar ba ka seng ka artatien ia ka jingsam Ata sha ki paidbah ka leit ban wad jingtip syndon na katei ka heh jong ka District.
Ha kane ka jingiakynduh ia ka heh jong ka district ba la ia don lang ruh u Superintendent jong ka Food and Supply ka District kim shem la lah satia ban pynshisha ia ka jingdon kitei ki Chakki Mill ba tylliat ia u Ata ban sam sha ki paidbah, hynrei na ka laing ka DC m ka Pooja Pandey ka la btah ia ki nongialam ka NKU ban pynlong noh da ka jingleit jurip ban lap ia ka jingshisha.
ha kane ka sngi haba kren bad ki nongthoh khubor , u President ka NKU, u Samla Sylvanus Malai u la ong ba ka seng ka sngew artatien ia ka jingdon kitei ki 12 tylli ki Chakki Mill ha kam District ba la buh ban tylliat ia ki Ata ban sam sha u paidbah, namar kumba long haduh mynta ka seng kam pat bna ei ei ba ki paidbah ki ioh ia u ata kumba la mang da ka sorkar.
U tei u president u la iathuh ruh kumba la lap da ka seng lyngba ka RTI ka don ka jingbhah ia ki Ata ban sam sha u paidbah ka District ha kylleng ki shnong, hynrei kaba sngewlyngngoh pat kumba ka seng ka la ioh lum jingtip ba kiba bun ki paidbah kim shem la ioh ia u ata ,hynrei ki ioh tang ia u khaw bad ka shini.
“Ban lap ia ka jingshisha ka seng kan nym shong kli kti, bad kan pynlong noh da ka jingjurip mynta ka sngi ban lap ia ki trai ba pyniaid ia kitei ki 12 tylli ki Chakki Mill, khnang ba na ka liang ka seng ruh kan ioh ia ka jingtip kaba bniah halor ki jaka bad ka jingdon kitei ki Chakki Mill” la ong u bah Malai.
U la iathuh ruh ha kane ka jingiakynduh mynta ka sngi ia ka DC ka seng ka la kwah ban leit jurip syndon ia kitei ki 12 tylli ki Chakki Mill ban lap ia ka jingshisha, hynrei namar ba na ka liang ka bor District kam pat lah ba ka la buh por ha kawei pat ka sngi ka seng ka la shim ia ka rai ban leit jurip noh hi da lade lashai ka sngi ban lap ia ka jingshisha.
Ka seng kan sa leit wan jingtip ruh na baroh ki paidbah nongshong shnong ka District la ki ioh neem ia u Ata kumba la kubur da u Superintendent ka Food and Supply ka District ba la sam sha ki paidbah, hynrei lada ka seng ka lap ba ki paidbah kim ioh ia ki Ata ka seng kan shim syndon da ki lad kiba tyngeh, u la la ong.(SP News)
