Shillong, Jymmang 30: Ki briew jong ka jylla Meghalaya kiba la sah kut hapoh Ri Bangladesh namar ka jingpakhang kila ioh ban wan phai sha la ka jong Ri ka jylla ha ka 28 tarik mynta u bnai baroh kiba wan phai ki long san ngut bad la leh ia ka Rapit Diagnostic Test (RDT) ha Tamabil ha Dawki jong ka West Jiantia Hills District.
Katkum ka list kaba la buh ban wan phai ki long hynriew ngut, hynrei katei ka sngi kiba la wan phai ki long tang san ngut katba u wei bala don ha ka list ba thmu ban wan phai u khlem wan phai.
Haba ia kren bad u Dr Simon Khonglah ba dei peit ia ka Dawki PHC, la iathuh ba la pyndep ia ki jingtest baroh katkum ki kyndon kiba la buh da ka sorkar bad ia ki la wanshaw da ki kali jong ka sorkar na Tamabil ban wan ialam ia ki sha Shillong ba kin don ha ki Quarantine Centre.
Na kine kiba wan phai ki don ki samla pule bad ki don ruh ki riew paidbah, haba la test ia ki baroh da ka RDT ka jingtest ka pyni ba ki long Negative. Na ka liang jong ka PHC kala leh baroh katkum ki kyndon kiba la bthah da ka sorkar, la iathuh u Dr Khonglah ba dei peit ia ka Dawki PHC.
