Shillong, Naiwieng 19: Ki nongthohkot bad ki myllung ba paw jong ka ri India ki la wan poi sha ka nongbah Shillong ban ïa shim bynta ha ka Shillong Literary Festival lane ka tamasa jong ka thoh ka tar kaba la sdang naduh ka 18 haduh ka 20 tarik u Naiwieng 2024. Ïa kane ka tamasa kaba lai sngi la pynlong ha Nan Polok bad mynta ruh ka dang ïaid shaid shaid.
Katto katne ngut na ki nongthohkot ba paw jong ka ri India kiba la wan poi sha kane ka tamasa ki kynthup ïa ka Shobha De, u Vikram Seth, u Jerry Pinto bad kiwei pat. Hangne la ïa donlang ruh ki nongthohkot na kane ka jylla ba kynthup ïa u Bah Kynpham Sing Nongkynrih, ka Kong Amabel Susngi, u Bah Avner Pariat, nangta u nongdro ba paw u Dr. Benedict Skhemlang Hynñiewta, u Dr. Desmond Kharmawphlang nalor kiwei pat.
Ha ka sngi sdang jong kane ka tamasa ki don kumba 3500 ngut eiei ki paidbah kiba la wan ban ïa shim bynta katba ka sngi kaba bud pat kata ha ka sngi hat majai ki don kumba 5000 ngut eiei, ka la don ka jingkhmih lynti ba ki paidbah kin nang kham bun shuh shuh ha ka sngi pynkut kata ha ka sngi balang ka 20 tarik u Naiwieng 2024.
Ha kane ka tamasa ki samla pule khamtam kito kiba sngewtynnad ban thohkot ki la ïoh ïa ka lad ban ïa kren bad ban ïa syllok markhmat bad ban pan jingmut ruh na ki nongthohkot khnang ba kin lah ban nang ïai pynjanai shuh shuh ha ka thoh ka tar. Hangne ki paidbah ki lah ruh ban thied ïa kiba bun jait ki kot ha ka ktien khasi bad ktien english ïa kaba la buh ha ki Stall bapher bapher.
Hadien ka jingïasyllok bad ka jingïaphylliew jingmut kaba baroh shisngi la pynjah thait ïa ki paidbah da ka jingput jingtem bad ka rwai ka siaw na ki kynhun bapher bapher ïa kaba la pynïaid lyngba ka Meghalaya Grassroots Music Project.
Kum ban shu pynkymaw hangne ba ïa kane ka tamasa la plie pyrda da u Myntri Rangbah ka jylla u Conrad K. Sangma ha ryngkat ka jingdonlang u Myntri sorkar ba peit ïa ka tnat jngohkai pyrthei u Bah Paul Lyngdoh, la don ryngkat ruh u Commissioner and Secretary jong ka tnat Tourism u Dr. Vijay Kumar D, u Principal Secretary ka tnat Arts and Culture u Bah Fedrick Roy Kharkongor, u Director ka tnat Tourism u Bah Cyril V. Diengdoh bad kiwei pat kiba la shah khot sngewbha.
Haba kren ha kane ka sngi sdang u Myntri Rangbah u la ong ba kane ka tamasa kan ïarap ban ai jingmut ïa ki samla ym tang ha ka thoh ka tar hynrei ba kin ïoh ruh ïa ka lad ban pynpaw pyrthei ban pyntbit bad nang pynjanai ïa ka sap jong ki la ha ka dro dur ne ha kiwei pat ki sap ba ki don. U la ong ba ki ïoh ruh ïa ka lad ban sei ïa ka sap jong ki ha ka rwai ka siaw bad ka put ka tem ïa kaba ka sorkar ka thrang eh ban nang kyntiew shuh shuh ïa ki.
