Shillong, Iaiong 04: U Deputy Commissioner jong ka West Jiantia Hills District u la pynjari ia ka kyndon 144 CrPC ha kaba la khang ia ki briew kiba don ha khappud bad ka jylla Assam ba kim dei ban leit rung sha Assam ban leit ia ki jingdon kam jong ki.
Ha ka juh ka por la maham ba ym bit ba kin leit ban ia kynduh ia kano kano ka kynhun kaba ai jingirap khlem da ioh ia ka jingbit na ki Block development Officer ban ioh ia ki jingiarap ha kaba ia dei bad ki marbam lada don kam pyntip sha u BDO, ki Gransevak.
La bthah ruh ia ki briew ba kim dei ban mih sha bar khlemd a deng ia ka Mask ban tap ia ka shyntur, ka khmut, bad ka rymmiang shyntur, la maham ruh ba kim dei ban biah pathar bad ia ki kti dei ban sait sabon bun sien.
Namar ka jingkiew jong ka jingpang COVID-19 ha ka jylla Assam, hynrei wat ha pdeng kane ka jingpakhang ki dang don ki kali kiba ia rung ia mih sha Assam na West Jaintia Hills District, ban ialeh pyrshah ia kane ka jingpang u DC u la pynjari ia ka kyndon 144 CrPC ha baroh kawei ka District.
Da kane ka jingpynjari la khang ia baroh ki surok kiba khappud bad ka jylla Assam, naduh ki surok PWD, ki surok PMGSY, surok ba la shna na ka MNGREGS, Ki surok shnong bad ki lynti iaid baroh la khang ban nym iai iaid shuh kiba don ha khappud.
La khang ia ka jingiarung ia mih jong ki kali na kawei ka jylla sha kawei pat. Ki kali kiba la shah ba kin iaid ki long ki kali jong ka FCI, Kali kit umphniang, kali kit dawai, kali kit tyndong lyer, ia kine ki kali ruh la shah ba kin iaid tang ha ki surok kaba ki dei ban leit.
Baroh ki pass kiba la dep ban ai ban leit kit jhur na ka jylla la Assam la weng noh mardor, ia ki kali kiba iai iaid hapdeng kawei ka District sha kawei pat hapoh ka jylla ruh la pynpyrkhing. Ia ki jhur baroh ban kit yn kit tang da ki kali jong ka “ITEAM-1917.
