Shillong, Jylliew 17: U Speaker jong ka iing dorbar Thawain ka Jylla Meghalaya u AT Mandal mynta ka sngi u la ai ka jingmynjur ka jong u ban ithuh ia u Dr Donkupar Roy kum u nongialam ka liang pyrshah hapoh ka iing dorbar jong ka Jylla Meghalaya.
Na ka liang jong ki dkhot ka liang pyrshah ki la phah da ka jingthoh sha u Speaker jong ka iing dorbar ban dawa ba ki don kam ia u nongialam ka liang pyrshah bad ki la ai ruh ia ka kyrteng jong u Dr Donkupar ba yn long u nongialam ka liang pyrshah.
Ia kane ka jingithuh ia u Nongialam ka liang pyrshah la pynmih mynta ka sngi da ka ophis jong ka Assembly Secretariat. Ia kane ka jingpynmih hukum yn sa phah sha u Dr Roy mynta ka sngi.
U Bah Paul Lyngdoh MLA jong ka UDP haba kren ha u SP News Agency u la ong ba ki dap da ka jingsngewnguh ia u Speaker jong ka iing dorbar ba u la ai ia kane ka jingithuh. U tei u nongialam jong ka UDP u la ong ba ha ka synshar paidbah don kam ia u nongialam ka liang pyrshah hapoh ka iing dorbar Thawain ka Jylla.(SP News)
