Shillong, Iaiong 17: U myntri rangbah ka jylla u Conrad K. Sangma mynta ka sngi 17/Iaiong/2026 u la ia kynduh ia ki dkhot jong ka seng A’chik Literary Society ha Tura, kane ka jingiakynduh ka long ban batai sha ki ia ka rai jong ka sorkar ban pynlong ia ka ktien Garo bad Khasi ryngkat bad ka ktien phareng kum ka ktien sorkar.
Ha kane ka jingiakynduh u myntri rangbah u la pynshai ba kane ka jingithuh kan kyntiew ia ka ktien ha ka jylla kane kan long ban kyrshan ia kaei kaba ka iing dorbar thawain ka jylla kala shim ia ka rai ba ka sorkar pdeng ka dei ban pynrung noh ia ka ktien Khasi bad Garo ha ka khyrngit kaba phra jong ka riti synshar ka Ri India.
U myntri rangbah u ai ka jingkhublei ia ka A’chik Literary Society ia ka jingtrei shitom bad ka jingiaineh lyngba ki jingthoh ban pynriewspah ia ka ktien Garo ia kane ka rai kaba ka sorkar kala shim ban ithuh ia ka ktien Garo bad Khasi kum ka ktien sorkar ha ka jylla ka dei ka jingtrei shitom jong ki ban pynneh pynsah ia ka ktien jong ki ha ka thoh ka tar ha ka ktien Garo.
U myntri rangbah u la ong ba kane ka jingdawa ban ithuh ia ka Ktien Garo bad Khasi kum ka ktien sorkar ka dei ka jingdawa kaba la slem bha bad haba la poi ka por bad ka ia kaba biang ka sorkar kala shim ia kane ka rai u la ong wat la ka sorkar kala shim ia ka rai kan shim katto katne por ban iaid beit iaid ryntih ha ka jingpyntrei kam bad da kane ka rai yn sa lah ban ia kren ha ka dorbar thawain ka jylla da ka ktien Garo bad Khasi.
Ha kane ka jingiakynduh na ka liang ka A’chik Literary Society ka ai ka jingkhublei ia ka sorkar kaba la shim ia kane ka rai ban pynlong ktien sorkar ia ka ktien Garo, kum ka kynhun na ka por sha ka por kila ia kren bad ka sorkar ia kane ka bynta bad mynta kaei kaba ki angnud kala urlong.
