Nongstoin, Rymphang 22: Ka jingialang kanbas election kaba la long ha shnong Langpih, kaba dei hapoh ka constituency Rambrai, ka la long ha iew Langpih ha ka 21 tarik Feb 2014, kaba don kumba 149 km na sor Shillong.
U Bah John F Kharshiing, ha ka jingkren u la kyrpad ia ki paidbah ban thaw lynti kum ki channel tv khubor kiba don bun tylli. Kumjuh, ha ka sain pyrthei donkam ban don bun ki nongmihkhmat.
U la ong ba ka jingsynshar ka neh na ka daw jong ka constitution, ka sixth schedule bad ki Ain jong ki Dorbar Shnong, Dorbar Raid bad ki Ain jong ki Hima Khasi states.
U la ong ba ki paidbah nongjied ki don ka hok ban jied ia kiba ki mon, bad u la ong ba ki donkam ban pyrkhat sani bha ban nym duh ia ka hok ban ioh ar ngut ki Nongmihkhmat kumba la buh ha ka constitution Ri India. Kumba ka long mynta ym don MLA ha Jaintia ne Garo kiba ialeh election MDC. Katba ha Khasi Hills ki don kumba 7 ngut ki MLA na ki 29 MLA constituency kiba ialeh election MDC.
Kumta u Bah John F Kharshiing, u la kyrpad ia ki paidbah ban ai lad ia u Bah Kimfa Marbaniang, ban long u nongmihkhmat kum u MDC na ka Seng Congress.
Na ka Liang u Bah Kimfa Marnaniang, candidate MDC na Seng congress u la kyrpad ia ka jingkyrshan kaba pura na ki paidbah bad u la kular ban ai ka jingshakri kaba khuid bad kaba shai.(SP News)
