Nongpoh , Jylliew 18: Ki paidbah ka shnong Umsong, Ri-Bhoi sepngi, lem bad ki shnong ba marjan ki la duh ban peit ia ka lympung lehkai ki khlur ka pyrthei ne ka World Cup ba mynta u snem.
Dang ha kine ki taiew ba la dep shuwa ba ka ka World Cup kan sdang na ka liang ka RBYF Umsong Circle ruh ka la pynpaw lyngba ki lad pathai khubor ban kyrpad ia ka MeECL ban pynbiang tikna ia ka bording elektrik hynrei katei ka jingkyrpad kam shym la urlong satia ha kaba ki paidbah ha katei ka shnong ki la mad ia ka jingdum iong ngit haduh mynta, kaba la long naduh ka miet Sngi Saitjaiñ.
U Bah R.B Lyngdoh, Rangbah Shnong ka Umsong, u la kynnoh ba ka shnong baroh kawei ka la mad ia ka jinglip ka bording elektrik naduh ba sdang ka World Cup bad ba ki paidbah ki la duh ban sakhi da la ki jong ki khmat lyngba ki television jong ki ban peitkai ia ka jinglehkai phutbol ki rang ia lehkai ka pyrthei ha kane ka World Cup ba mynta u snem.
U bah lyngdoh u la kynnoh ruh ba ka jinglip ka bording elektrik ka dei ka jingtlot treikam jong ka MeECL kaba ym lah ban ai ia ka jingshakri kaba bha tam jong ka sha ki paidbah khamtam ba bun na ki paidbah ki kwah bad thrang ban sakhi man la ka miet ia ka jinglehkai ha katei ka lympung jong ka jing ialeh kai world cup.(SP News)
