SHILLONG, Ïaïong 15: Ka Hynñiewtrep National People Movement (HNPM), ha ka jingpyllait khubor mynta ka sngi, lyngba u Bah Rangdajied
Donshiew, vice president, ka kyntu ia ka sorkar jylla ba ka dei ban
shimkhia ia ki kam khappud hapdeng ka Meghalaya bad Assam, khnang ba
ki trai jylla kiba shong ba sah ha ki thaiñ khappud kin ioh ban
shongsuk shongsaiñ, kum kiwei pat ki nongshong shnong ha kiwei ki
jylla jong ka Ri India.
Ha ka kyrwoh, u Bah Donshiew u la kynnoh ba ka sorkar
jylla man ka por ka shu sngap man man bad ka leh meinah pynban ia ki
trai jylla ha ki thaiñ khappud, kaba la pynlong ia ki briew na kiwei
pat ki jylla ban wan ban klun bad iai klun ia ki jaka ki puta jong ki
trai shnong ha kane ka jylla.
U la ong ruh ba dang shen la iohi ha Langpih bad la
iohsngew ruh ba ki briew na shabar ka jylla ki la nud ban pynibor wat
ia ki jaka puta jong ki trai jylla, kaba kitei ki bar jylla kim kheiñ
shuh wat ia ki lum jingtep jong katei ka shnong, pynban ki la nud ban
klun ha kitei ki jaka ban wan buhai shnong.
Ka kyrwoh ka la ong ruh ba imat ka jylla jong ngi kam
sngewthait ban iashem shi iashem bad ki bor jong ka jylla Assam, ha
kaba kat nang khot ia ki jingiakren, katta ki bar jylla na Assam ki
nang iohlad ban klun bad pynthut ia ki jaka puta jong ki trai jylla,
kaba la wanrah ia ka jingtieng jingsyier ia ki briew kiba dei ki trai
jylla ha kitei ki jaka bad kiba shong syier bad rit mynsiem na ka por
sha ka por.
Ka seng ka dawa na ka sorkar jylla ba ka dei ban pynsangeh
noh shisyndon ia ki jingiakren bad ki bor ka Assam, namar kam poi
shano shano ruh ia kane ka jingiakren bad ka seng ka kyntu ruh ia ki
bor sorkar jylla ba ki dei ban leit ud leit nam noh shakhmat ka sorkar
pdeng ba kan tuklar lem ia kane ka jingjia pud hapdeng kitei ki ar
jylla bad pynbor ruh ia ka sorkar pdeng ba kan thaw noh da ka “Border
Commission” khnang ba yn lah ban thew ban pruh biang ia ki jaka puta,
kino kiba dei hok jong ka jylla Meghalaya bad kino kiba dei jong ka
Assam.
Ka seng ka kyntu ruh ia ki MLA ne MDC khamtam ia kito
kiba dei na ki thaiñ khappud bad ka Assam ban pynbor ia ka sorkar
jylla ban leit rah ia kane ka jingiakajia khappud hakhmat ka sorkar
pdeng khnang ba ka sorkar pdeng kan bishar ia ka jingeh jong ka jylla
bad ka Assam bad nangta ban ioh ia u pud u sam uba paka bad uba skhem,
namar ka jingbym don ia u pud u sam uba tikna ka pynlong ia ki bor ka
Assam ban klun bad thombor katba nang mih ki sngi.
Ka seng ka kyntu ruh ia ki bor jong ka sorkar jylla
khamtam ia ka Home Ministry jong ka jylla ba kin buh da ki State
Police Battalion ha shilynter ka khappud bad ka Assam, tad haduh ba ka
sorkar pdeng kan da pynbeit ia u pud hapdeng ki ar jylla, kaba dei
tang kane ka lad ban wanrah ia ka shongsuk shongsaiñ ki trai jylla
kiba shong ha ki jaka khappud.
Khatduh eh ka HNPM ka phah ia ka khubor sngewlem sha baroh
kito ki paradoh parasnam kiab la shah lehbeiñ na ka por sha ka por ha
ki bor jong ka Assam, la pynkut ka kyrwoh na u Bah Rangdajied
Donshiew, vice president ka HNPM.(SP News)
