Shillong Nailur 24: Wat la ka jylla ka dang don hapdeng ka jingiakhih da ki seng kiba dawa ban pyntreikam ia ka ILP ha kane ka jylla, na ka liahng jong ki samla pule jong ka Kiang Nangbah Govt. College, Jowai, hapoh ka lama Kiang Nangbah Govt. College Students Union, ki la mih sha khmat ban dawa na ka sorkar ba ka dei ban pynbiang ia ki jingdon kam katei ka College.
Haba kren ha ki nongthoh khubor mynta ka sngi ha Shillong Press Club, ki nongialam jong katei ka college u Bah T Ram Phawa u la ong ba ka sorkar ka dei ban pynbiang ia ki jingdon kam ha kane ka college bad kine ki jingdawa ki la iaid mynta la hynriew snem lynter.
Ki jingdawa jong ki samla pule katei ka college ka long ba ka sorkar ka dei ban pynheh ia kane ka college, ka dei ban buh ia ki nonghikai ba puta na ka bynta kito kiba pule ha ka por mynstep bad ka dei ban ai ia ka basket ball court.
La iathuh ba la ai ia ka jingdawa jong ki sha ka sorkar la bun bun sien hynrei kam shym la leh ei ei na ka liang jong ka sorkar haduh kine ki sngi.(SP News)
