Shillong, Nohprah 06: Ka Congress party kaba bat ia ka sorkar ha ka jylla Meghalaya mynta ka don ha ka jingartatien la kan pynlong ia ka election sha ki lai tylli ki District Council ha ka jylla ha u bnai Lber ne ka hap ban pynjlan ia ki iing dorbar jong ki lai tylli ki District Council?.
Ki thymmei khubor kiba la ioh da u SP News Agency, kiba ia jan bha bad ka seng Congress la ong ba na ka liang jong ka seng Congress mynta ka don ha ka jingeh ban shim ia ka rai lada pyntrei kam ia ki delimitation ha kane MDC election kaban long ha u snem ban wan ha u bnai Lber ka District Council Affair Department kan shem jingeh ban pynbeit ia electoral roll na ka bynta ki nongthep vote.
Ban shim ia kane ka rai la yn pyntrei kam ne em ia ki constituency MDC kiba thymmai ka shong ha ka sorkar bad ynda ka sorkar ka shim ia ka rai kan hap ban phah sha u Lat jong ka jylla bad ka shong ha u Lat ka jylla la un pdiang ne kyntait lada ka don ka jingkwah ban pyntrei kam ia ka delimitation.
Namar ki District council kim pyniaid da lade ia ka election ka sorkar ka aiti ia kane ka kam sha ki Deputy Commissioner ba kin pyniaid ia ka election jong ki District Council.
Na ka liang jong ka KHADC ynda ka la ioh ia ka kaiphot na ka Delimitation Committee kan sa khot ia ka jingiashong dorbar kaba kyrpang na ka bynta ban pass ia ka bad phah sha ka sorkar na ka bynta ban ai ia ka jingmynjur. Kane ka jingkwah ban phiah thymmai ia ki MDC constituency bad ka por ban long election ka la jan palat.
Bun na ki nongpeit pyrman ki sngew ba lada pyntrei kam ia ka delimitation ha kane ka MDC election ka ban wan la hap ban pynjlan ia ka por trei kam jong ki lai tylli ki iing dorbar namar ka sorkar ruh ka hap ban pynkhreh ia ka elelction.(SP News)
