Shillong, Jymmang 07: U superintendent jong ki pulit jong ka East Khasi Hills u la ong ba ka jingkem jong ki pulit ia ki ar ngut ki nongialam jong ka seng KSU ka long halor ki sabut ba ki don bad ki, ki pulit kim juh kem pathar khlem da don ka sabut.
U Bah Kharkrang u la ong ba katkum ka ain ym nym lah ban pynlait ia u briew khlem da don ka jingbah jamin, ka lynti ban pynlait ia ki ka don, hynrei ban pynlait khlem da the kyndon yn nym lah da lei lei ruh dei tang ka iing bishar ba don burom ka ban ai ia ka rai.
Ka jingbat ia ki ar ngut ki nongialam jong ka KSU kaba hynniew sngi lynter ka la kut mynta ka sngi, hynrei kumba ka long haduh mynne ym shym don mano mano ruh ban wan pan jamin. Mynta kine ki ar ngut ki la don ka ha ka judicial custody, hynrei u wei na ki u la don ha Civil Hospital ban phah sumar.
Haba ia dei bad ka jingthang ia ka kali hapoh Forest Colony kaba dei ka kali sorkar, ki pulit mynta ki la tip ia ki briew bad haba ki leit ban wad ha ki iing jong ki kim don bad haba la kylli na ki kmie ki kpa ki ruh kim tip sha ei ki don bad haba la ong ba kin ujor ba ki jah na iing ki kmie ki kpa kim treh ban leh ia kata.
Na kane ki pulit ki pynshisha ba kine ki briew ki don kti bad lada kim don kti ba lei kin jah na iing bad kumno ki kmie ki kpa haba ki khun kim don ha iing kim lah ban ujor.
Haba ia dei bad ka jingkhot pkhang kali miet kaba ar sngi lynter ia kaba la khot da ka KSU na ka liang jong u Bah Kharkrang u la ong ba na ka liang jong ki pulit ki la pynbiang ia ki lad ai jingiada ba kan nym ktah ia ka shong suk shong sain.(SP News)
