Nongpoh, Naiwieng 26:Kum shibynta ban iamih paidbah sha ka jingialang paidbah ha Shillong ha ka 30 tarik mynta u bnai, kaba la pynbeit da ki 14 tylli ki seng bhalang na bynta ban pynshai halor ka Inner Line Permit (ILP) ka Hynniewtrep National Youth Front (HNYF), Northern Region Ri-Bhoi district, ka la pynkhreh ia ki kali na ka bynta ki paidbah ban leit sha katei ka jingialang ha Shillong.
Haba kren ha ki Nongthoh Khubor u President ka HNYF, Northern Region Bah Banpynskhem Kharnaior u la ong, ba ka seng ka la pynbeit ia ki kali ban kit ia ki paidbah sha katei ka jingialang kumba la pynbeit bad la kyrpad ia ki paidbah shynrang bad kynthei ban ia mih ryntih lang ban ia leit sha katei ka jingialang paidbah ha Nongbah Shillong bad ban sngap da la ki jong ki shkor aiu ki nongialam seng bhalang ka jylla ki don ban ong halor kane ka ishu ILP kaba la ktah mynta la jan dap lai bnai.
Ula kyntu ruh ia baroh ki dkhot na ki Circle bad Unit ha Ri-Bhoi district ban ia leit paidbah sha katei ka jingialang kumba la pynbna bad ba kin ia mih da ki kali ba la pynkhreh ha ki jaka bad ki shnong ba ki don.
Na ka bynta ki paidbah ha Nongpoh bad u Umsning, ka seng ka la pynkhreh ia ki kali ban shaw na kitei ki jaka bad kumjuh ruh ha ki thain Bhoirymbong.
Halor kane ka seng ka kyrpad rit ia ki paidbah ban iasnohkti lang ha katei ka sngi ban leit paidbah bad mih na la ki shnong ki thaw khnang ba kane ka ishu jong ka ri bad ka jaidbynriew yn lah ban pynurlong kumba ki nongialam sengbhalang bad ki paidbah ki angnud kaba la leh klet da ka sorkar jylla.
U la bynrap ruh ba ngi ieng na ka bynta ban pynim ia ka ri bad ka jaidbynriew, ym na ka bynta ka myntoi shimet, dei namar kata ka daw ba kum ka seng kaba don ia ka jingkitkhlieh, ka la pynmang kyrpang ban shaw ia ki paidbah na kylleng ka district ban leit sha katei ka jingialang.
Kumjuh ula kyntu ia ki paidbah kiba kwah ban tip kham bniah halor kane kin sngewbha ban phone sha ki president ne general secretary jong ki Circle ne Unit ba don ha ki shnong jong ki bad ba ki lah ruh ban wad jingtip na kiwei ki nongialam ki Circle bad Unit bad kumjuh ruh na ki nongialam jong ka Northern Region, la pynkut u Bah Banpynskhem. (SP News)
