Shillong, Naiwieng 24: Ka jingialang jong ka Board Meeting jong ka Meghalaya Electrical Corporation Limited (MeECL) kaba la long ha ka 18 tarik mynta u bnai ka la shim ia ka rai ba kan pynskhem ia ki nongtrei kiba don ha Leshka tang ia kito kiba la trei shuwa jong u snem 2008.
U Bah Elias Lyngdoh Director ba dei peit ia katei ka project u la ong ha u SP News Agency katkum katei ka rai ki trai jaka kiba la lah ban pynskehm ia ka jingtrei jong ki hapoh jong ka MeECL ki don 13 ngut.
La ong ba ki dang don bun kiwei ruh hynrei ka board ka la shim ia katei ka rai namar ka hap ban pyrkhat ruh ia kiwei kiba la trei slem bad ka MeECL kiba la trei shuwa jong u snem 2004 kaba ka board ka kwah ban pynskhem ia ka jingtrei ka jong ki.
Katkum ka jingkhein kaba don mynta ki dang don palat ia ka 1000 ngut ki nongtrei ha ka MeECL kiba la trei shuwa jong u snem 2002 ter ter haduh 2004, ia kine ruh ka board ka hap ban leh ei ei ban pynskhem ia ki.
Halor ka jingbyrngem jong ka synjuk ki rangbah shnong ban khang ia ka Lehska u Bah Lyngdoh u la ong ba ha dien ba ka Board ka la shim ia katei ka rai ki rangbah shong ki la weng noh ia ka jingthmu ia khih ka jong ki bad na ka liang jong ka Board ka la ia kren sngewthuh ruh bad ia ka jingeh kaba ka Board ka don.(SP News)
