Jowai, Kyllalyngkot 13: Maham tyngeh ka KSU Laskein Circle ia ki mynder ri ba wan khaii Hadien ka jingujor na ki paitbah ka thain, Ka KSU Laskein Circle ka la buh ka jingmaham pyrshah ia ki mynder ri ba kim bit ban wan khaii hapoh u pud u sam jong ka Laskein Block la ha ka jingtyrwa ne thied tiar sha ki shnong bap her bapher bad khamtam ha ki jaka iew kum ha Raliang, Mowkaiaw, Iooksi bad Sahsniang. Ka seng ka la iohi ba ka jingwan khaii jhur/tiar jong kine ki khyllah jait ka wanrah ka jingduhnong kaba khraw ia ki para thain/ri kiba trei ia kine kijuh ki jaitkam.
Ka jingjyllei kine ki bar jylla khamtam ha ki kam khaii ka long ka jingknieh ia ka kamai kajih/jakpoh jong ki trai muluk khamtam ka jingdie jong ki ia ki mar ki mata barim (ki mar sah stock) hapoh ka ‘retail price’. Katba nangmih ki sngi kine ki mynder ki la nangroi nangroi haduh katta bad kane ka ktah ia ki trai muluk.
Ha kine ki por ba la dep, baroh kine ki mynder ri kim lah pyni ia ki Laisen khaii jong ki ne pynshisha ia ka jaka ba kiwan bad ngi la thait ban phah leit phai ia ki man ka por sha ki jaka ba ki wan khamtam na Ladrymbai bad kiwei. Ki paitbah ha ki shnong kyndong ruh ki syier mynsiem, haba kine ki mynder ki iaid mushlia ia ki lad ki lynti , ki iing ki sem bad kren khor ruh ia ki kynthei ki khynnah khamtam ha ki sngi ba ki rangbah ki leit trei leit ktah ne ki kyndong kynshrot.
“Ngim hun ban long tang ki nongpeitkai ia kane ka jinghiarthma ba jar jar jong kine ki khyllah jait. Kane ka jingmaham kan treikam naduh ba pynbna ia kane ka khubor”, la pynpaw u samla Leningrad Tariang, u General secretary ka seng.
Ka seng ka kyntu bad kyrpad ia ki paidbah(khamtam ki para samla) ba kin ia snoh kti lang ha kane ka kam bad ban don ka jingsngew ban kyntiew bad kynrong para jaitbynriew bad ban ym thied jingthied na ki khyllah jait Bad ruh ia ki nonngshongiew ban ym die palat dor ia ki mar ki mata.
Lyngba kane ka khubor, ka seng ka buh ka jingmaham ba tyngeh ia kine ki mynder ri baroh bad khamtam ia ki dalal bad ki riew khwan myntoi shimet ban ym phah ia ki khyllah jait ban leit khaii shapoh ki thain Laskein block(elaka Raliang) bad ruh ban ym khein troin ia ki para ri lajong ba sah sha kine ki thain ba ioh sa kyrtoh kylla hadien. Ha
kajuh ka por, ka seng kan ym kitkhlieh lada jia kaei kaei ka jingjia ba sngewsih ia ki.
Kane ka long ka kyrwoh na u Asst. Publicity Secretary ka KSU Laskein Circle, u samla Seibormi Sutnga.(SP News)
