Shillong, Nohprah 19: Ka seng lehnoh HNLC mynta ka sngi ha ka kyrwoh kaba la phah lyngba u Saiñkupar Nongtraw Publicity Secretary, la ong ba ha ka jingialang jong ki nongialam jong ka seng kaba la long ha ka 18 tarik mynta u bnai ka la ia kren halor ka jingkem pathar jong ki bor sorkar ia ki samla bad thep ia ki ha ki along da kaba kynnoh khlem nongrim ia ki.
Ka HNLC ka ong ba bun na ki jingduh kiba la jia ia ki jingdon jingem jong ka sorkar la shu kynnoh ia ki samla khlem da lap ia ki jingshisha bad lakem ia ki bad kane ka la buh ia kiba ha iing ha sem ha ka jingeh ha kaba ki hap ban mareh kylleng ban bah jamin ia ki khun ki kti bad kiba bun ki dei ki briew kiba wan na ki long iing kiba duk.
Kumba ka long mynta la beh kthong ia ki nongialam jong ki seng bhalang kiba la khot ia ka jingiakhih ban dawa ia ka ILP na ka sorkar kane ka jingiakhih jong ki seng bhalang ka long katkum ka riti synshar paidbah,ka jingkem ia ki nongialam seng bhalang la pynngat ia ki ha ki kyndonjong ka ain MPDA.
Na ka liang jong katei ka seng lehnoh kala kynnoh ba ka sorkar ia ki myntri sorkar bad ia ki ophisar kiba la kynnoh ba ki la pynjah klep ia ka pisa jong u paidbah ym shym la leh ei ei ia ki. Ka sorkar pdeng kala niew beain haduh mynta tang ia ka seng HNLC.
Ka seng HNLC ka niew ba kane ka jingleh jong ka sorkar ka long kaba laleh don bor bad kum ka dak jong ka jingpyrshah bad ban dawa na ka sorkar ba ka dei ban pynlait noh khlem jingteh kyndon ia kiba la shah kem ka seng ka khot ia ka pakhang shnong kaba 12 kynta ha ka 23 tarik mynta u bnai. Kane ka jingkhot pakhang shnong kan sdang naduh ka por 6 baje mynstep haduh ka por 6 baje jan miet ha katei ka sngi, la ong ka kyrwoh jong katei ka seng lehnoh.(SP News)
