Shillong Nailur 05: Ki sengbhalang jong ka jylla kila rai ban pynlong ia ka Pakhang Ophis ne ka Office Picketing ha ka sngi siatjain ha baroh kawei ka jylla bad ki sengbhalang kila pynkynriah ia ka por jong ka Pakhang surok ha kaba kan sdang noh naduh ka por 10 baje mynmiet bad kan kut ha ka por 5 baje mynstep.
U Vice President ka KSU u Fredrick Kharmawphlang ula ong ruh ba ki sengbhalang kila pynkynriah ia ka por jong ka Pakhang surok namar ka jingkyrpad jong kiba bun balang bad ula pynpaw ruh ia ka jingsngewnguh ia ki paidbah kiba la kyrshan ia kane ka jingiakhih jong ki sengbhalang bad ba kin dang bteng ban ai ka jingkyrshan kaba pura ia ki sengbhalang ha ka jingdawa ia ka Inner Line Permit (ILP) bad ula kyntu ruh ia ki nongtrei sorkar ba kin iatreilang bad ki sengbhalang da kaba kin pep trei ha ka sngi saitjain kaba dei ka Pakhang ophis.
Une u nongialam ka KSU ula pynrem jur ia ka jingshim kabu jong ki pulit da kaba pyndonkam da ki kali 108 ne ki Ambulance kiba dei ki kali kiba kit ia ki nongpang bad ula ong ba ia ki kali 108 la thied da ka sorkar na ka bynta u paidbah khamtam ban ai jingshakri ia u duk u suk ha ka pang ka shitom hynrei kaba lyngngoh pat ban iohi ka long ba ia kine ki kali la pyndonkam da ki pulit.
U Vice President ula kyntu ruh ia ki paidbah ba kin burom ia ka por haba ki sengbhalang ki pynlong ia ki jingiakhih khnang ba kin ym ngat ha kino kino ki jingjia kiba sngewsih na ka jingshimabu jong ki riewshimkabu ha ka por ba dang iaid ki prokram jingiakhih ha kylleng ka jylla.(SP News)
