Shillong, Jymmang 24: Tang ka sorkar marwei kan nym lah ban pynkiew ia ki kam ialehkai ha kano kano ka jaka don kam ia ka jingia snoh kti lang jong ki riew shimet ne ki kompeni kiba don ha ka kata ka Ri ne ka Jylla.
Ha kane ka jylla Meghalaya la iohi ba ka jingailehkai kynjat ball kawei ka wei na ki jingialehkai kaba baroh ki briew ki ieit ia ka bad ki sngewtynnad naduh ki jaka sor bad sha duh ki nongkyndong, hynrei ban pynkiew ia ka ka don ka jingeh namar la shaniah tang ha ka sorkar.
U Director jong ka tand ialehkai ka sorkar Meghalaya haba kren ha u SP News Agency u la ong ba tang na ka tand ia lehkai marwei ka shem jingeh ban pynbiang ia ki jingdon kam lada ki riew shimet kim wan sha khmat ban ia shim lem ia kane ka kam bad lada ki kompeni kin noh synianglang.
Na ka liang jong ka tand ialehkai jong ka sorkar ka ai jingiarap ia kito ki samla kiba don ia ka sap ka phong bad ban kyntiew ia ki sha ki bynta kiba kham sha jrong ba kin ia mih pyrthei ha ki jingialehkai kiba ha rukom, hynrei ka jingiarap kam lah ban bei lut ia baroh namar ka don ka jingduna ha ka liang jong ka jingmang pisa.
Naka liang jong u Director u la kdew ba ka jingkiew jong ka jingialehkai kynjat ball ha kane ka jylla ka dei na ki riew shimet kiba la shim khia ia kane ka kam bad ki da pynlut ban kyntiew ia ka jingialehkai kynjat ball, kum ka Shillong Lajong Sport Club, Rangdajied Sport Club , Wahiengdoh Sport Club lem bad kiwei. Ka jignai jingiarap ka sorkar bad ka jingpynlut ka jong ki kam ia hap.
Ka sorkar mynta ka pynshlur ia ki jingalehkai martial arts, kum ka Judo, Boxing, Karate, ka sorkar ka ai jingiarap ia kito ki kynhun kiba don ia ki briew kiba tbit ki banhikai ia kane ka kam namar ka tand ialehkai kam don ia ki nonghikai ha kane ka liang.(SP News)
