Ki san kynhun ha ka rukom pyrkhat ia ka thoh khasi dei ban ia wan lang ban pynbeit ia ka ktien khasi

Shillong, Nailar  20: Ka  Khasi jaintia Presbyterian Assembly (KJPA) mynta ka sngi ka la pynlong ia ka jingialang ban ia pyrkhat kumno ban wanrah ia ka jingspel dak kaba beit bad kaba ryntih ha ka toh ka tar ia ka ktien khasi kaba long kaba don kam mynta.

Ha kane ka jingiamir jingmud kaba la long mynta ka sngi ki la don ar ngut ki khraw pyrkhat kiba la ai ia ka jingthoh ka jong ki bad kito ki long u pastor Rev JTRS Mawklot bad Dr Badaplin War kiba la ai ia ka jingthoh jong ki bad ban pynshai ia ka rukom thoh.

Ka Dr  Badaplin ka la kdew ha ka jingai jingthoh ka jong ka ba ka don kam ia ka bor kaba lah ban ithuh da ki bor jong ka ain ban ai ia ka rai ha kaba ia dei bad ka rukom spell da ha ka ktien khasi. Kumba ka long mynta ki nongthoh baroh ki spel ia ki dak katkum ka jingsngewbit ka jong ki.

Ha ka jingia ai jingmud na pdeng ki nongwan ia shim bynta ha ka bynta kaba ar jong ia jingiathir sani ia kane ka kam, ki la pynpaw ba kumba ka paw mynta ki don san tylli ki rukom pyrkhat ha kaba ia dei bad ka rukom spell dak khasi ban pynbeit ia kane don kam ia ka ain na ka sorkar bad ka sorkar ka dei ban thung ia ka State Sabha Academy.

Kawei pat ka sur ka ong ba shuwa ban poi sha ka sorkar la dei ban ia kynduh lang baroh ki san tylli ki khynhun ha ka rukom pyrkhat ha kaba ia dei bad ka rukom thoh ia ka ktien khasi bad kiba paw mynta kine ki kynhun pyrkhat ki long ka Presbyterian, The Seng khasi,   Khasi Author Society, Ka Catholic bad ka  Khasi department jong ka North Eastern Hills University.

Kine baroh san tylli ki rukom pyrkhat ha kaba ia dei bad ka jingspel dak khasi ki don la ka jong ka jong ka jingpyrkhat bad kane ka la pynkulmar ia ki nongthoh bad ka la ktah ia ki khynnah skul naduh ki klass A haduh kiba don ha ki skul bah

Na kane ka jingiamir jingmud kaba la long myhnta ka sngi ka long ba ka KJPA kan rah ia kane ka jingsngew sha ka Synod ban shim ia ka rai ban leh ia kaba don kam. Hynrei baroh ki nongwan ia shim bynta ki la pynsngew ia kawei ka sur kaba ong ba ka por ka la dei ban pynbeit noh ia ka rukom spell dak ha ka ktien khasi.(SP News)