Shillong, Iaiong 24: Ka Ri-Bhoi Youth Federation (RBYF), kala kynnoh ia ka jingtorti ha ka rukom pyntreikam jong u kontraktor ia ka surok Umsning-Mawrong, kaba don kumba 16 km ei ei, kaba la shu moramot ia katei ka surok tang dep rukom khlem da leh janai ne sani bha na ka bynta ka jingbha ka leit ka wan jong ki paidbah katei ka thaiñ.
U publicity secretary ka RBYF ha ka jingpynlait khubor mynta ka sngi u la ong ba katei ka surok Mawrong, kaba shakri ia ki bun tylli ki shnong ki thaw bad lah ban ong ba ka
dei ka surok kaba pei ruh shaduh Umkei bad Umsaw Nongbri, ka long pynban ka surok kaba wanrah ia ki jingsngewsih ia kiba bun ki nongshong shnong, namar ka jingsniew jong ka bad mynta pat la shem ba ka long shuh shuh ka surok kaba wanrah jingsngewsih khamjur ia ki paidbah, namar la shu trei torti ia ka, u la ong.
ka seng RBYF ka la kynnoh ba nalor ba la trei torti, la shem ruh ba ki don bun tylli ki jaka ba ia ka jingheh jong katei ka surok, la nang pynrit bad pynkhim ia ka, kaba la pynlong ia ka jinglyngngoh kaba khraw eh ia kiba bun ba lang, khamtam ba ka sorkar jylla ka don jingthmu ban shna pynheh ia ki surok kali, hynrei ha katei ka surok la shem ba u kontraktor u nang pynrit pynban kaba long da mar khongpong, la kynnoh katei ka seng.
Ha kajuh ka por ka RBYF ka la thaw ruh ia kawei ka tnat treikam jong ka seng kaba kyrpang na ka bynta ki kynthei da kaba sdang shuwa na ka shnong Mawrong, ia kaba la tip kum ka RBYF Women’s Wing, Mawrong unit.
Ha katei ka jingjied, ka Kong Patrisha Sylliang ka la long ka president, ka Kong Sahnam Moksha, vice president, ka Kong Eucharist Moksha, general secretary, ka Kong Thirteen Syngkli, asst general secretary, ka Kong Phangei Moksha, finance secretary, ka Kong Modest Makdoh, treasurer, ka Kong Sibilian Shadap, education secretary, ka Kong Twenty Shadap, organizing secretary bad ka Kong Apkyrmen Lymphuid, publicity secretary.(SP News)
