Sohra,Rymphang,07: Ka jingwan poi thep kyrteng mynta ka sngi thohdieng jong ki kyrtong ban aireng ha ka jylli iakhun elekshon MDC tang hapoh Sohra Civil Sub-Division ka la kot sha ka 3 ngut.
Ka kynhun ki nongthoh khubor haba iakren bad u Bah Pynthymmaibor Chyne, kyrtong ka Seng Congress na ka Shella Constituency, u la pynpaw ba u angnud ba ka thaiñ Shella hi baroh kawei kan nangkiew shaphrang ha baroh ki liang, bad bynrap, la arphew hynriew snem mynta ka UDP ka la bat ia u lakam synshar ha kane ka constituency hynrei kam don satia ka jingkiew ha kane ka thaiñ bad ym shym la iohi ba ka kane ka thaiñ kan kiew.
U la ong ruh ba u kwah ban nang pynkhie im ia ka riti ka dustur jong ka jait bynriew Khasi kaba la sdang ban nang hiar, kumjuh ruh nga don ka mynsiem bad nga kloi ban iarap ia ki paidbah katba nga lah.
U Bah Pynthymmai u la ong ba kum u briew uba kloi ban iarap ia kiba duk basuk kiba iakynduh ia ki jingeh jingjynjar u long uba iar ka mynsiem.
“Nga hap ban trei shitom bad nga hap ban iarap ruh ia ki paidbah khnang ban ba ngan ioh ia ka jingshaniah na ki paidbah namar ba ka rai ka shong ha u paidbah,” la ong u Bah Pynthymmai.
U Bah Rangphlang Khongwet uba long u Kyrtong shimet na Sohra Constituency u la ong ka jingthmu bakongsan haba mih sha kane ka lympung ka long ka jingangnud jong u ban pynneh pynsah ia ka mariang bad kumjuh ruh ia ka riti ka dustur jong u Khasi kaba la sdang ban jah noh katkum ba la pynkup bor ha ka Sixt Schedule jong ka riti Synshar ka ri India.
U Bah Rangphlang u la ong ha kaba iadei bad ka Trading License dei ban don da u pud haba ai license ia ia ki bar jylla, ym ban shu ai pathar ia ki namar kane ka long kaba ap ia ka jingma ai ka jaitbynriew hi ym ia kiwei pat.
Une u Rangbah u la pynpaw ruh ba u angnud ba un iarap ia u paidbah,lada ki dei ki kup shiliang ki sem shiliang ruh, u kwah ruh ban don ka jingiajan bad u paidbah lada u dei uba duk ne uba riewspah.
U la ong shuh ba ki paidbah nongkyrshan, ki dei kiba wan na ki longing kiba duk bad kiba rit baria ym ki heh spah.
Haba kylli ia u, kaei ka daw ba um shym la rung sha ki seng sain pyrthei ban pan tiket, une u rangbah u la jubab, “kam pher la nga ieng kum u kyrtong shimet namar kaba kham kongsan kan long ka jingshakri kaba kham paka ba nga lah ban ai sha u paidbah. (SP News)
