Shillong, Iaiong 30: ka MeECL mynta ka phai khmat sha ka sorkar Meghalaya ba kan wan sha khmat ban iarap ia ki ban siew ia ka ram sha ka NEEPCO. Kumba ka long mynta na ka liang jong kane ka company jong ka sorkar jylla ka don hapdeng ka jingkyrduh pisa.
Katkum ki jingtip kiba la lah ban ioh da u SP News Agency, wat la ia ka MeSEB la pnykla mynta ka sha MeECL ka bor ka dang bat hi bad ka sorkar jylla, bun ia ki jingdawa jong ka MeECL ha kaba ia dei bad ka jingpynkiew ia ka bai light kaba ki la kwah ka sorkar haduh mynta kam pat lah ban pdiang.
Ka kabai light kaba mih na ka Myntdu Leskha kaba dei ban die ha ka dor lai tyngka shi unit la phah ia ki ban die tang ha ka dor T. 2.9 tyngka, kum ka long mynta ka dei ka jingshisha ba ka MeECL ka don ha pdeng ka jingkyrduh.
Ha ka juh ka por la ong ba ka MeECL haduh mynta kam pat ioh ia ka bha jong ka na ka sorkar jylla kaba dei kum ka subsidy, kane ruh ka la buh ia kane ka company jong ka sorkar jylla ha pdeng ka jingeh. Kaba lah ban leh ei ei mynta ka long sa tang ha ka sorkar.(SP News)
