Phi kwah jingtip wan sha ka ophis jong ka seng ong ka JYF

Jowai, Naiwieng 20: Ka Jaintia Youth Federation JYF ka pynpaw ia ka jingsngewkhia halor ka khubor ba la pynmih da ki katto katne ngut ki kyrteng snaiap kiba ym don ba tip ne ithuh ia ki hapoh jong ka seng kiba la kam ialade kum ki riew shemphang kiba stad bad tip lut ia ka duh ka dang jong ka saw ka sian kumba ki la kynthoh kulmar khlem da pule bniah ia ka khubor ai jingmut da u President jong ka JYF Sengkmie bah P.L Majaw sha ki lad pathai khubor khnang ba ki paibah ba bun balang kin iohtip shai, kiba kumno ki nongmih khmat ngin jied mynta haba kum ka ne ka por bad ka samoi ba ka jaitbynriew ka don hapdeng ka jinglynga bad pisa bym don shuh ki nongialam kiba long shlur ban kren na ka bynta ka iap ka im jong ka jaitbynriew hynniewtrep hynniawwasa.

Ka JYF ka kyndit ban iohi ia ka wei na ki kot khubor kiba la mih ha kine ki sngi ba u R.Lytan, Shkeh Suiam, Baniewkor Passah, P.Kyndait & Dangheini PL Phawa, ki pan jingpynshai na u president ka Seng ba u dei ban pynshai ba ha ka ei ka clause ne Article jong ka Constitution jong ka JYF ba u President u lah ban tyrwa kyrtong election ha kyrteng jong ka seng, kine kiba kylli lorni ia ka riti treikam jong ka Seng ki dei tang ki khwan lorni bad bishni ia ka rukom khraw pyrkhat jong ka Sengnamar ia ka riti treikam jong ka JYF na ka por sha ka por ngi lah ban pynkylla (Amend) ia ka.

Ngin buh ia phi kawei ka jingkylli ba hato phi dei ne em ki dkhot jong ka JYF ba phi kwah ban tip ia ka kam pohing pohsem jong Seng, haba uwei ruh na phi um dei u dkhot ka JYF, ka seng hi kam lah ban ai jingshai ia phi kiba shukam ialade ha kyrteng jong u paitbah ban ioh shim kabu ban pynjah burom ne pynthoh bria ia ka Seng, haba ialade ruh
phim don kano kano ka jingiakren ne ia phylliew jingmut bad ki nongialam jong ka Seng ha baroh shikatta.

Ha ka juh ka por ka JYF ka khot ia phi ki ba kwah jingshai u R.Lytan, Shkeh Suiam, Baniewkor Passah, P.Kyndait & Dangheini PL Phawa,ban wan mih ha office treikam jong ka seng lada phi dei shisha ki khun dap shynrang kiba kwah ban ioh jingpynshai na ka seng, kumba dei ka rukom jong ka seng haba donkam kino kino ki briew ka jingkhang ka plie da kaba burom ia ki nongwan pan jingmut, ai jingmut ym kum phi kiba ialeh
politic ban kynnoh, kynthoh ha ki lad pathai khubor tang na ka daw ka jingsngewstad palat kan ialam pynban sha ka jingia mynsaw.

Kaba sngewlyngngoh bad sngewthamula ia kine ki briew kiba pan jingshai na ka seng, ki dei tang ki riew sngewstad kiba shu im sngi ban bishni, lorni bad ap thap tang kumno ban ioh pynjah burom ia ka JYF hapoh ka jingialam ba tbit u President bah P.L Majaw uba la ialeh shitom ban kyntiew ia ka Seng ha ki ba bun ki liang jong ka jingshakri na ka
bynta ka Ri bad ka Jaitbynriew, khamtam ka seng mynta ka dang don hapdeng ka jingialeh ryngkat bad kiwei de ki Sengbhalang ban pynbor ia ka sorkar ban pyntreikam ia ka Innerline Permit ILP hapoh ka jylla khnang ba ngin ioh jingiada na ka jingshah tyllep ha u mynder shisngi,

Ngi kwah ban ong hangne kumba la kynthoh pynjah burom khlem nongrim da kine ki kyrteng snaiap, ba ha ei ka JYF hapoh ka jingialam u bah majaw ka kyrsum politic sngewbha ai ka kyrteng jaka, ka tarik bad ka ei ka jait party ba u ia kyrsum, lym kumta ka seng kan leh da ka ba tyngeh ia kum kine ki jaitbriew kiba ialam bakla ia ki paitbah da kaba shu kynthoh kulmar khlem da sngewthuh shai ia ka jingthoh baroh namar ban
pynjot ka long ka ba suk eh tang ha ka shikhyllipmat lah dep, ban tei pat ia kaba la dep pynjot pynpra ka long ka shimpor ban pynbha pat pynkut u kyrwoh na ki tei ki nongialam ka JYF.

Kumta na ka liang ka Seng ka ai por ia phi hapoh shitaiew ban wan mih ha office treikam jong ka JYF kumba phi la kynthoh bad pan jingpynshai na ka Seng ba phin sngewbha ban wan khlem pep bad lada phim lah ban wan mih ka seng hi kan sa leh ia ka ba donkam namar ka don ka jingsubaia ki katto katne ki riew shim kabu kiba kwah ban pynthohbria ia kaJYF da ka kyrteng snaiap.(SP News)