Shillong, Naitung 07: U Lat ba la leit noh jong ka jylla Meghalaya U RS Mooshahary u la pynpaw ia ka jingsngew ka jong u ba ha ka jingsah jong u ha kane ka jylla Meghalaya u la sngew ba u dei u trai shnong na kane ka nongbah shillong namar ki por ba rim ba u la pule ha kane ka nongbah ki la wan biang ha u ha kaba u la ioh ban ia kynduh ia ki paralok na kane ka jaka. “ Nga la sngew kum ha shnong la jong” u la ong.
Haba kren ha ki nongthoh khubor u la ong ba ka jylla Meghalaya ka la kiew ha kiba bun ki liang bad ka jingduna ruh ki dang bun ba ka sorkar ka dang hap ban leh, hynrei kaei kaba dang pynsah nud ia u ka long ka jinglong ka shong suk shong sain ha Garo Hills ka dang synjor.
U la kren diaw mynsiem ruh ia ka jingkiew ki kam bat bor ha kane ka jylla ia ki kynnhah kynthei, u la ong ba kaba pynlyngoh ia u ka long ba ia kane la leh bun sien da kiba ha iing ha sem la jong. Ka sorkar marwei kam lah ban teh la kam ia kane bad ia kane ka dei ka kam jong ki paidbah ban ia trei lang bad ki bor jong ka ain.
Haba jubab ia ki jingkylli u la ong ba u long u ba la kloi ban wanrah ia ka jingiakren ia pynbeit pud ha pdeng ka jylla Meghalaya bad ka jylla Assam lada kine ki ar tylli ki sorkar ki kloi ban pynlong ia u nongpyniakren lem.
Haba ia dei bad ka sain pyrthei u la ong ba ia mynta hi ym pat kwah ban shongthait kumnot ha ka jingim ka jong u u kwah ban dang iai trei bad lada ka lad ka lynti ka pli ia u u long u ba la kloi ban ia khun ia ka election ha ka snem ban wan hynrei kumba ka long haduh mynta ym pat kawei ruh ka seng sain pyrthei kaban kynjoh ktien ia u.
Haba ia dei bad ka roi ka par u lat ba la leit noh u la kdew shai ba kam dei na ka jingduna pisa hyrei ka dei na ka jingpyntrei kam ia ki skhim ha ka rukom ka bym shong nia. Halor ka jingtrei kam jong ka sorkar u la ong ba ka sorkar ha ba ka leh ia kano kano ka kam ka dei ban leh ba ki paidbah ki dei ban tieng ban leh ia ka jingsniew hynrei ki paidbah ki dei ban kloi ban leh ia kaba bha.(SP News)
