Mawkyrwat, Na
ilar 16: Ka Kong R. Lyngdoh, IAS, Deputy Commissioner South West Khasi Hills District mynta ka sngi ka la ïoh ban plie ïa ka jaka sumar khmat ne kata ka “Vision Centre Based Community Eye Health Project” jong ka Bansara Eye Care hapoh Mawkyrwat ha ryngkat u Bah H.G. Lyngdoh, Superintendent of Police kum u symbud kongsan.
Haba ai jingkren ha kane ka sngi na ka liang ka Kong R. Lyngdoh, IAS ka la ong, “ba ka jingkoit jingkhiah ka long ka spah bah”, ka la ong ruh ba, “ki khmat ki long ka jingkhangïit sha ka pyrthei”. Ka la kyntu ïa baroh ba kim dei ban kheiñ sting ne dih dawai kulmar ha kaba ïadei bad ki khmat namar kane ka wanrah ïa ka jingshitom bad wad ban duhnoh ïa ki khmat ruh.
Ha kajuh ka por ka la buh ruh ka jingkyrpad na ka bynta ki Seng Samla Shnong, ki Seng longkmie, ki Myntri shnong bad ruh ki paidbah ba wan ha kane ka prokram ba kin rah ïa ka khubor ba ki ïoh ha kane ka sngi ban sam lem bad pyntip ruh sha kiwei. Lyngba kane ka prokram ka kyrmen ba ki nongshong shnong jong kane ka thaiñ kin ïoh ïa ka jingsumar kaba biang na ka bynta ki khmat bad ka buh ruh ka jingkyrpad ban long kiba ïatreilang khnang ban wanrah ka jingseisoh bad ruh ban wanrah ïa kane ka District kaba koit kaba khiah ha ki liang baroh.
Na ka liang u Bah H.G. Lyngdoh, SP ka Mawkyrwat Police Station ula ong ba ka khmat ka long kaba donkam ha ka jingim u briew, namar khlem ka jingïohi (vision) jong ki khmat u briew u jynjar bha ban trei ïa ki kam. Ula pynpaw ruh ba da jingplie ïa kane ka jaka ai jingsumar na ka bynta ki khmat kan lah ban ai jingïarap na ka bynta ki briew jong ka dong ka thaiñ Mawkyrwat baroh kawei bad ruh kan lah ban ai jingshakri na ka bynta ki briew ha ki thaiñ nongkyndong ruh.
Ula ong ruh ba ha kaba ïadei bad kane ka kam na ka liang ki bor pulit kin ai ka jingkyrshan kaba pura na ka bynta kane ka kam jong ka Bansara Eye Care ha kaba lada na ka liang ki nongsumar kin leit sha ki jaka kiba kham pajih kum sha ki thaiñ khappud ban lei tai jinsumar na ka liang u SP ula tyrwa ba ki bor pulit ki long ba la kloi ban ai ka jingïada kaba biang ïa ki.
Ha kane ka sngi la ïoh ruh ka jingkren pdiang na ka Kong Deepa Lamin Khonglah bad bud sa ka jingkren na ka Doktor J.V. Basaïawmoit, na ka Doctor M. Marbaniang, DMHO bad ruh ka jingkren ai khublei na u Bah Jubanlak Thangkhiew.
Hadien ba la dep ïa ka jingïalang la ïoh ruh ban pynlong ïa ka prokram ai jingsumar ei na ka bynta kiba pang khmat ha kaba shibun na ki paidbah ki la wan ban ïashimbynta ha kane ka sngi.
