New Delhi 26: Ka seng kaba dei peit ia ka hok long briew man briew Asian Centre for Human Rights (ACHR) ka pynrem jur halor ka jingshah pyniap jong ki lehnoh Maoist ia ki nngalam jong ka seng Congress ha kajylla Chhattisgarh.
Ha kane ka jingsait pathar jong ki lehnoh Maoist, ki nongialam Congress kiba la duh ei ia la ka jong ka jingim ki long u Mahendra Karma bad u Godi Madwani, katba u myntri ba rim jong ka sorkar pdeng u V C Shukla u la mynsaw jur.
Ki lehnoh Maoist ki la siat ia ki nongialam jong ka seng Congress ha Darbha Ghat kaba hap hapoh jong ka District Bastar ha ka 25 tarik mynta u bnai. Ha kane ka por ki nongialam congress ki dang iaid ban leit sha Keshloor ha dien ba ki la wan phai na ka jingia paidbah ia kaba la tip kum ka “Parivartan Yatra” ha Sukma.
Na ka liang jong ka ACHR ka ong ba kam shym don kano kano ka nongrim ba ki Moist kin pynksan ia kane ka jingleh ka jong ki ban sait ia ki riew lui lui kiba khlem don kano kano ka jingiada. Kane ka jingleh jong ki Moist ka la pynkhien ia ka hok long briew man briew.
U Suhas Chakma, Director ka ACHR u la ong ba ki nongialam jong ki Maoist ki dei ban shim ia ka jingkit khlieh halor kane ka jingjia bad ha ka juh ka por ka sorkar pdeng bad ka sorkar jylla ka dei ban trei tyngneh ban pynshitom ia kiba don kti katkum ki kyndon jong ka ain.(SP News)
