Nongpoh, Jymmang 08: Katba ka jingpyntreikam ban pynheh ia ka surok bah NH-40 sha ka surok fourlane ha Ri Bhoi District ka dang iaid shait shait, hynrei bun na ki paidbah ki la hap ban mad ia ki jingeh kiba bun, ha kaba ka shnong Umlyngkdait hajan Nongpoh ka la mad ia ka jingeh ha ka jingtyrkhong um kaba la neh mynta la kumba ar taiew ei ei na ka daw ka jingshah rat naphang da ki bor mashin jong ka kompani M/s NKC Pvt. Ltd ia ki pipe ring um jong ka tnat PHE.
U Bah B.L Marweiñ, secretary shnong ka Umlyngkdait, u la iathuh, ba ka dorbar shnong hi ka la pynpaw ia ka jingsngewkhia kaba jur halor kane ka jingtrei torti jong ki briew ka kompani NKC kaba dei ka kompani kaba dang pyntrei ia ka jingpynheh surok jong ka fourlane ha ka district, naba ki nongtrei kane ka kompani kim shem la pyrkhat shuh ia ka jingdonkam jong ki paidbah bad khlem kano kano ka jingsalia ki la rat beit da ki mashin heh ia ki pipe um ka PHE kiba shalan um sha ka shnong.
U la iathuh ruh, ba dei namar kane ka jingtrei torti jong kane ka kompani kaba la buh ia ki paidbah ha ka khep kaba khim ha kaba ki la hap ban mad noh ia ka jingtyrkhong um hapoh ka shnong ka thaw hi baroh kawei, watla na ka liang ki bor shnong ki la pyrshang ban pynbeit noh ia kane ka kam ban weng ia ka jingeh u paidbah hynrei la iohi pynban ba katei ka kompani kam don kano kano ka jingsngew halor kane ka jingeh u paidbah.
Kumta, na ka liang ka Dorbar Shnong jong ka shnong Umlyngkdait ka la dawa na ki bor ba dei peit halor ka umbam umdih ka PHE ba kan shimkhia ban wan jurip noh ia ki pipe shalan um kiba la shah pynjot noh ha katei ka kompani bad ruh ban maramot noh mardor khnang ba ki paidbah kin iohlem ia ka umbam umdih kaba tikna bad ruh khnang ba kin nym hap ban mad shuh ia kum kane ka jingeh halor ka jingtyrkhong ka umbam umdih.(SP News)
