Shillong, Jymmang 22: Ka Company Lafarge Umiam Minging Private Limited ka hap ban siew sha ka Special Purpose Vehicles Committee (SPVC) ha ka dor T.90 tyngka shiton na u Mawshun na ka bynta ban pyntrei ia ki kam pynroi sha ki shnong ki thaw kiba don sawdong jong katei ka jaka tih Mawshun jong ka Company.Kane ka jingsiew kaba T.90 tyngka ka long kaba tam nalor kiwei ki jingsiew kiba ka hap ban siew sha ka sorkar jylla.
Kane ka pisa kaba la siew da ka Lafarge ka long na ka bynta ki kam pynroi sha baroh kito ki shnong kiba hap hapoh ka 50km sawdong jong katei ka jaka tih mawshun kaba don ha Nongtrai. Ka sorkar jylla ka la thaw ia ka Special Purpose Vehicles Society na ka bynta ba kin pyntrei kam ia kane ka pisa ha ki kam pynroi.
Haba kren ha u SP News Agency na ka liang jong u Secretary jong ka Society u la ong ba ki la ioh pdiang na ka SPVC na ka bynta ban pyntrei ia ki kam pynroi T. 18.61 klur bad kane ka pisa kan leit sha ki kam ki jam jong ka Soceity bad ki kam pynroi.
Ki skhim kiba la sdang mynta ki long ban shna ia ki 1000 tylli ki painkhana ha ki hynniew tylli ki shnong bad ban ring umdih ha ka shnong Nongtrai ka la kot sha ka T.5.94 klur bad na ka bynta ban shna ia ki iing skul ka la kot sha ka T.2.33 klur bad na ka bynta ka rep ka riangbad ka Ri Jingri ka la poi sha ka T.5.22 klur.
Katkum ka rai jong ka iing bishar kaba ha khliehduh jong ka Ri India ka long ba ia ki skhim pynroi dei ban pyntrei kam ha baroh ki shnong kiba hap hapoh ka 50km sawdong na katei ka jaka tih mawshun,baroh ki shnong ki don 52 tylli, hynrei ia mynta tang pyntrei kam tang ha kine ki shnong ka Nongtrai, Shella, Mustoh, Nongwar, Laitkynsew, and Nonglait.(SP News)
