Shillong, Sept 14: U Hari Sarkar u la ai ia ka jingujor sha u Additional District Magistrate jong ka South West Khasi Hills District ba u Dilbag Nashier bad u Bablu R Marak u pulit ba don ha Borsora out post ba ki la dawa pisa na u T.15 lak tyngka.
Haba kren ha ki nongthoh khubor mynta ka sngi ha Shillong Press Club u Hari u la ong ba u la shah thok ha u Dibag Nashier ha ka jingiatrei kam lang ha Borsora kaba hap hapoh jong ka South West Khasi Hills District ban ia seng ia ka jaka shna kali ha u snem 2012.
U muktiar jong u Sarkar’s u PK Bora u la ong ba ka long kaba sngewlyngoh ban tip ba ha ka 11 tarik mynta u bnai ba ia kane ka jingujor ka jong u kaba la buh ha ka ophis jong u ADM jong ka Mawkyrwat u M S Sangma ka la jah na ophis.
La ong ba u Nashier u la rah ia ka lathe machine bad ka pisa T.70000 tyngka ban phah shna ia ka sha Guwahahti, hynrei ynda la wan phai na Guwahati ha ka jaka ba yn wanrah ia ka machine u ioh pdiang pynban da ka legal notice kaba ong ba u dei ban siew sha u Nashier T.15 lak tyngka kaba dei ka bynta jong u katkum ka jingteh kular. Na ka liang jong u Sarkar u la ong ba kam juh don kum kata ka jingiateh kular.
Katkum ka jingujor kaba u la ai sha ka iing bishar jong u ADM jong ka Mawkyrwat u la ong ba ha dien ka 4 tarik jong u Nailar mynta u snem u la ong ba u Nashier bad Bablu ryngkat bad ki kynhun kiba la rah ia kit air pynmynsaw ki la shim lut ia ka pisa na u katb au don bad pynbor ia u ban soi ia ka kot ba u la mynjur ban siew ia ka 15 lak tyngka.
Na ka liang jong u Hari u la kynnoh ba u Bablu u pulit ba dei peit ia ka Borsora Out post u la don ka jingiasylla lang ban lum pisa na u man ka taiew bad ban peit ia ka kam ka jam jong u kaba u trei la kynnoh u Hari.(SP News)
