Shillong Nailur 24: U Information bad Publicity Secretary ka Federation of Khasi Jaintia and Garo Peoples (FKJGP) u Eldie N Lyngdoh ula ong ba ka katkum ka jingmih ha ki kotkhubor ba ka don ka jingthmu ban kem ai ki 3 ngut ki nongialam baha khliehduh jong ki lai tylli ki seng, bad kane ka jingthmu ka dei tang ka jingpyntieng ia ki nongialam kiba ieng ha ka nongrim ban dawa ia ka Inner Line Permit ban iada iala ka ri bad jaidbynriew.
Une u nongialam ula ong ba ki sengbhalang kin iengskhem beit hala ka nongrim watla ka sorkar ka thmu ban pyniap noh ia ka mynsiem iakhih jong ki sengbhalang kiba ieng ban dawa pyntreikam ia ka ILP ha ka jylla bad kane ka jingiakhih, kan nym kut noh tang da ki jingpyntieng hynrei ki nongialam kin dawa beit pyntreikam ia ka ILP ban pyrkhing ia ka jingwan tuid kyrthep ki briew bana bar”
“Lada u poi haduh u pud ban ktah bad kem ia ki nongialam kiba dawa ia ka ILP, Ngam thrai ba u paidbah uba la sakhi ia ka jingshah iuhroit ka jaidbynriew ha baroh ki liang lada phai sha ki kam ki jam,ka khaii ka pateng bad ia ka imlang sahlang bad u paidbah yn ym shong kli kti bad na ka liang jong ki seng bhalang ki la ong ba kin leh da kaba tyngeh lada ki ktah ne kem ia ki nongialam ba ha khliehduh jong ki sengbhalang” la ong u Eldie N Lyngdoh.
Ha kawei pat ka liang ula kyntu ia ki paidbah ka bri u Hynniewtrep ba kin iasnohktilang bad iashimbynta shitrhem ha ka jing iashong kyllain mungor kaban long ha ka 25 tarik ban dawa na ka sorkar ban pyntreikam noh mardor ia ka ILP ha kane ka jylla.
“Kum ka jaidbynriew kaba iatylli kum ha kane ka por kaba ka jaidbynriew ka donkam, Ngi dei ban leh ia kaei kaei kaba donkam na ka bynta ka jingbha jong ki longdien mandien” la pynkut u bah Eldie.(SP News)
