Shillong, Risaw 18: Palat spah ngut ki khynnah kiba la ia poi na ki lai tylli ki ri jong ka south East Asia kiba kynthup ia kiba na Bangladesh, Nepal, Buthan bad na kane ka Ri India ki la ia kynduh lang ban ia kren bad ia phylliew jingmud hapdeng jong ki bad u myntri rangbah ka jylla Meghalaya u Dr Mukul Sangma.
Ka jingthmu jong kane ka jingiakynduhlang ka long ban wanrah ia ka jingsngewjan hapdeng ki para briew na kawei ka ri sha kawei pat bad ban wanrah ia ka jingsngewlong kawei ha ka Ri bad ban pynshlu ia ka jinglong kaba khlem don kata ka jingsngewniam, hynrei ban ia kyntiew ha kiba bun ki liang.
Kaba kongsah eh kane ka jingiakynduh ka long ban ia tip ia ka kolshor jong kiwei kiwei ki bynta jong ka pyrthei bad ban wanrah ia ka jingsngew shipara bad ka jingiaieit.
Ha ka jingkren jong u myntri rangbah ka jylla u la ong ba kane ka long kaba don kam namar kan iarap ban tip iwei ia iwei pat bad kan iarap ia ki khynnah ban sngewthuh ia ka jong kiwei ruh bad ba kin long ki nongrah ktien ia ka jingiaieit para briew.
Kumba ka long ki khynnah ki dei ki nongialam ka lawei jong kano kano ka ri bad ban long ki nongialam ki hap ban sngewthuh kumno ban ia burom markylliang da ka jingiaieit bad ia jan iwei ia iwei pat bad u la kyntu ba ynda ki la leit phai sha la ka jong ka ri kin long ki nongwan rah ia ka jingkylla ha ka imlang sah lang. (SP News)
