Shillong, Naiwieng 04: Mynta ka sngi 04/Naiwieng/2026 ka skul bah National Institute of Technology Sohra kala pynkup burom ia ki samla pule kiba la pyndep ia ka jingpule ka jong ki ha ki kyrdan bapher bapher.
Ha kane ka sngi ki samla pule kiba la shah pynkup burom baroh kiba la pyndep ia ka jingpule jong ki ki don 321 ngut ha kane ka jingshah pynkup burom kaba 13th na ka liang kane ka skul bah ia ki samla pule kiba la pyndep ia ki jingpule.
Haba kren sha ki samla ha kane ka sngi u Dr. Anand Deshpande, u nongseng bad u shongknor ba dei ruh u Managing Director jong ka Persistent Systems Ltd. U la kren ia ka jingkylla ha ki sngi ki ban dang wan ha kaba iadei bad ki kor ki bor na kaba bha sha kaba kham bha shuh shuh bad kane ka dei ka lad kaba ap ia ki samla kiba dang pule bad kiba dang shu pyndep ia ki jingpule.
U kyntu ia ki samla ba kin pynkhreh ia ki jingpule ka jong ki na ka bynta ki kyrdan kiba kham sha jrong khnang ba kin dang lah ban trei ha ka kam wat hadien ba kila shong thait na ka kam namar kum ki briew ki lah ban trei na ka bynta bun bun snem katba ki kompeni ki lah ban jah noh ruh.
La kyntu ia ki samla ba kin dang hikai shuh ban dang tip ia ki kor ki bor kiba thymmai katkum kane ka juk kaba mynta khnang ba ki lah ban iabeh ia ka jingkylla ka por, ha kajuh ka por u la ban jur ban ia beh katkum ka jingdonkam ka por ha kaba ka Ri India ka dang pynkhreh ba ha u snem 2047 kan sa long ka ri kaba la kiew ha ki liang baroh.
