Shillong, Naiwieng 04: U Myntri rangbah ka jylla u Conrad K. Sangma mynta ka sngi 04/Naiwieng/2026 u la plie paidbah ia ka ophis jong ka District School Education Office kaba don ha Mawkhar bad kumjuh ia ka jaka ieng kali ba bun mala kaba don ha Motphran ha ka jingiadon lang u symbud myntri rangbah ka jylla u bah Sniawbhalang Dhar.
Ia kine ki jingtei la shna lyngba ka Shillong Smart City Mission ha ka jinglut kaba T.38.92 klur/- tyngka bad lah ban pynieng ia ki kali haduh 200 tylli ha kajuh ka por bad kumba ka long ka jingdheng kali ha sor Shillong la iakren ym tang da ki paidbah hynrei wat ki nong wan jngoh kai pyrthei ruh kila kren ia kane.
Haba kren ha kane ka jingialang ban plie ia ka ophis jong u DSEO bad ia ka jaka ieng kali ba bun mala u la ong ba ki tnad sorkar bapher bapher kila shim ia bun ki lad ki lynti kumno ban weng ia kane ka jingdheng kali hynrei kane kan nym lah ban iarap kumta donkam ban leh kaei kaei ban weng shi syndon ia kane ka jingkhapngiah kali kumta kila shna ia kane ka jaka ieng kali.
U myntri rangbah u la ong katba ki dang shna ia ki jaka ieng kali ha kajuh ka por kin don ruh ki jaka ban nym shah ban ieng kali bad kane kan pynlong ia ki briew ba kin nym pynieng kali pathar, na ka liang ka sorkar ka dang wad ia ki lad ki lynti ba lada don ki jaka jong ki shnong ki thaw lane jong ki riew shimet ruh ban pynkylla sha ki jaka ban pynieng kali.
Ka sorkar kala don ruh ia ka Policy jaka pynieng kali ia kaba la tip kum ka State Parking Policy ha kaba ka sorkar kan ai jingkyrshan T.1,00,000/- tyngka ba kin shna pynbha ia ki jaka ieng kali ia kaba yn pyniaid bad longtrai hi da ki trai jaka hynrei kan don pat ka jingnoh synniang na ka jinglum ia ka bai ieng kali sha ka sorkar u myntri rangbah u la kyntu ba ki dei ban peit bha bad sumar ia kine ki jaka.
