Shillong, Nailur 30: Ka kynhun ki samla pule nurse jong ka jylla mynta ka sngi ka 30 tarik Nailur 2024, ki la leit ban iakynduh ia ka Myntri ka koit ka khiah ka Dr. M Ampareen Lyngdoh bad ki nongpynïaid ka Board ban pan ka jingpynshai halor ka jingmih ki kynrum ki kynram ha ka ba iadei bad ka jingpynbna ia ki result jong ki bad kumjuh ruh ha ia ka jingbymhun halor kane ka bynta.
Ha ka jingiakren bad ki lad pathai khubor na ka liang u nongialam ka kynhun ki nongpule nurse u samla Lurstep Nongspung ula pynpaw ka jingbymhun halor ka rukom pynmih ïa ka resol na ka bynta ka examin Staff Nurse nalor ka Auxiliary Nurse Midwifery (ANM).
Kaba la pyllait da ka Meghalaya Medical Services Recruitment Board (MMSRB) da kaba kdew ba ki don bun ki kynrum kynram halor kane ka resol ba kynthup naduh ka jingmih arsien ujuh u roll number nalor ka jingbym pymnih lut ïa ki roll number bad ki kyrteng jong ki samla kiba la ïaleh ïa kane ka eksamin.
U la ong ruh ba ka board ka la pynshai ba ka jingmih arsien jong ki roll number kadei namar ba ki dei na ka bhah ialehkai bad ka bhah Garo da kaba pynpaw ba um pat shai halor kane ka bynta.
Ha kane ka sngi la wan ban synranlang ia ka kynhun ki nongpule nurse da ki nongïalam ka Employment Monitoring Cell jong ka Khasi Students Union (KSU) bad ki nongïalam ka Jaintia Students Union (JSU).
Ha ba iakren bad u samla Reuben Najiar, Chairman ka Employment Monitoring Cell KSU, u la ong, ba ka MMSRB kadei ban pynduh shwa ïa kane ka resol bad ban pynmih da kawei kaba pyni ïa baroh ki kyrteng bad ki roll number jong ki samla kiba la ïaleh ïa kane ka eksamin khnang ba kan ym don kano kano jingnoh shiliang ha ka rukom thep kam.
U la ong ruh ba nalor kata ha kaba ïadei bad ka eksamin thep kam, kam don ka examination rules lane ka recruitment rules ka ban teh lakam bad dei na kane ka daw kan sa don ka kynrum ka kynram ha ka rukom thep kam thep jam.
U samla Reuben Najiar u la ong ba na ka liang ka board ka la kular ban pyllait ïa baroh ki marks ha ki khyndiat sngi bad ban aipor ïa kiba ladep ban ïaleh ïa ka eksamin ba lada don kano kano ka jingbymhun kin phah ïa ki jingujor sha ka board lyngba ka grievances cell.
Na ka liang u President ka JSU u samla u la pynpaw ba ha kine ki khyndiat sngi ki la mih shibun ki kynrum ki kynram ha ka ba iadei bad kane ka rukom pyniaid ia kane ka exam.
U la kynthoh ruh ba ka sorkar ka nang tangban pyniaid ia ki tamasa hynrei ha ka ba iadei bad ki rukom thep kam thep jam ki khunsamla ki kulmar baroh. U la ong ruh ba kane ka jingleh jong ka sorkar ka long ba ki kwah ba ki samla kin ia bira lang bad kita ki riew paidbah ki bymdon ia ka thong ha ka jingim.
U la ongruh ba ka sorkar ka dei ban peit bniah bha bad ba kam dei ban leh kamkai bad ka jingim ki khunsamla ka Jylla.
