Shillong, Risaw 29: Ki pulit jong ka Lumshnong Police Station kila ioh tam kwei ka met jong u rangbah briew u ba ymlah bantip kyrteng na ka jaka bala tip kum ka Sohja kaba hap ha Dongkhliehchnong ha East Jaintia Hills District kaba jngai tang 200 meter na surok bah NH-6.
Na ka liang jong ki pulit kila ong ba ka met kala pyut ym lah shuh ban ithuh bad la suba ba u ba khlad dei u bar jylla. Na ka liang jong ki pulit kila leit sha katei ka jaka ban leh ia kaba don kam katkum ka ain.
Ki pulit kila ong ba la antad ba ka rta jong u ba khlad ka long ha pdeng 40 snem ei ei, ka jingjrong jong u ka long 5.5 phut bad u phong ka patlum kaba iong bad ki sopti ba tohlieh thohiong.
Na ka liang jong ki pulit kila kyntu ba lada don mano mano ba tip ne ithuh ia u tei u briew kin sngewbha ban pyntip sha ki pulit da kaba phone ha u snem u number 9874703816 .
