Shillong, Nohprah 17: Ka myntri ba dei peit ia ka tnad Social Welfare ka Debora Ch Marak kala kular ba ka sorkar kan leh katba shong ka ain ban pynshitom ia ka Lei Shynshar Cultural Society namar ka la pynkhein ia ka Juvenile Justice Act da kaba phah 20 ngut ki khynnah kynthei sha Tamilnadu hapoh jong ka kynhun kaba la pyniaid da ka seng kaba khlem pat register bad ka sorkar namar ka la phah ia ki kynnoh kiba hapoh ka 12 snem ka rta sha katei ka jaka.
Na ka liang jong ka sorkar kan sa thung ia ka kynhun tohkit ha kaba ia dei bad kane ka kam, hynrei na ka liang jong ka myntri ka la kyntait ia ka jingkynnoh ba kine ki khynnah ki la shah die sha katei ka jaka.
Haba ia dei bad kane ka jingjia na ka liang jong ka iing bishar ba don burom jong ka Madras High Court ka la buh teng ia kane ka kam haduh u bnai kylla lyngkot jong u snem ban wan.
Na ka liang jong ka sorkar ka sngewkhai ia kane ka jingjia bad ka kwah ban iohi ba kine ki khynnah kin don hapdeng ka jingshong shngian, lada ka ing bisahr ba don burom ka ai ia ka rai na ka liang jong ka sorkar ka long kaba la kloi ban leit shim ia ki ban wanrah biang sha la ka jong ka jylla. Hynrei na ka liang jong ki kmie ki kpa ki sngew pyrshah ia kane ka jingkwah jong ka sorkar.
Kine ki khynnah kynthei 20 ngut ki dang long hapdeng ka rta 8 haduh 13 snem kine ki dei na West Khasi Hills, East Khasi Hills bad Jaintia Hills ia kine la ialam da ka Lei Shynshar Cultural Society bad u president u dei u Bah B Khonglam na Pynursla bad secretary dei bah P Kynjing na Jowai bad la phah ia ki sha ka Sri Nevidita Seva Trust, Hosur, Tamil Nadu.kane ka kynhun ai jinghikai ei ia kine ki khynnah.
Ia kine ki khynnah la lap da ka CWC ki bor sorkar jong ka Krishnagiri District , Tamil Nadu bad la rah ia ki sha Narendra Nambikkia Natchathiram ka jaka kaba la buh ia ki khynnah , ka jaka kaba la register bad ka JJ Act.
Kane ka jaka ri khynnah kala pyntip sha ka iing bisahr ba don burom. Ha u Risaw na ka liang jong ki heh sorkar ka jylla Meghalaya kila leit ban ia kynduh ia ki dkhot jong ka CWC jong ka Krishnagiri district administration bad la ai ia kane ka jingujor sha iing bishar. Ia kine ki khynnah ym shym la lah ban shimti namar ka iing bishar kam pat ai ia ka rai.(SP News)
