New Delhi, Kyllalyngkot 11:Ka Trophy FIFA World Cup kaba sdang nyngkong eh (original) ka la wan poi sha India kum shi bynta ka FIFA World Cup Trophy Tour da ka Coca-Cola. Kane ka pyni ïa ka jingwanphai biang jong ka sha India hadien 12 snem snem, ha shwa jong ka FIFA World Cup 2026. Kum ka paralok bad nongkyrshan ba kyrpang jong ka Trophy Tour, ka Coca‐Cola ka dang bteng ïa ka jingïatreilang kaba la slem bha ha ka jingïadei bad ka phutbol da kaba wanrah ïa kawei na ki dak ïalehkai ba pawnam tam ha ka pyrthei sha ki nongkyrshan ha Ri India.
Ïa kane ka Tour la sdang da ka FIFA Charter Landing, bud sa ka jingpyni paidbah ïa ka Trophy FIFA World Cup kaba sdang nyngkong eh ha Taj Mahal Hotel, Man Singh Road, Delhi. Ha kane ka jingpyni paidbah la ïadonlang da u Myntri Sorkar India ba dei peit ïa ka tnad Youth Affairs and Sports, u Dr Mansukh Mandaviya, u nongīalehkai barim ka Brazil uba la jop ïa ka World Cup, u riewpawkhmat ka FIFA, u Gilberto D’Silva, u nongthoh khana sports bad u nongthoh, u Boria Majumdar; ki nongïalam na ka Coca-Cola kynthup ïa u Sanket Ray, President, Coca-Cola India bad Southwest Asia; Greishma Singh, Vice President, Marketing, Coca-Cola India bad Southwest Asia; bad Devyani Rana, Vice President, Public Affairs, Communications and Sustainability, Coca-Cola India bad Southwest Asia.
Haba kren ha kane ka sngi, u Myntri Sorkar India ba dei peit ïa ka tnad Youth Affairs and Sports, u Dr Mansukh Mandaviya, u la ong, “Hapoh ka jingïalam ba don jingthmu jong u Myntri Rangbahduh ba donburom, U Narendra Modi, ka jingïalehkai ka la mih kum ka jingdonkam ba kongsan jong ka Ri. Ngi ngeit skhem ba ka jingialehkai ka long ka atiar kaba khlaiñ ban pynroi ia ka jinglong ryntih, ka jingshaniah, bad ka jinglong ba bha khamtam eh hapdeng ki samla jong ngi. Ka FIFA World Cup Trophy Tour ka pynsawa jur ïa ka jingangnud ban buh ïa ka India hapdeng ki san tylli ki ri kiba pawnam ha ka pyrthei ha ka jingialehkai ha u snem 2047. Katba ka India ka nang kiew shaphrang ha ka ka jingïaid lynti ban long ka Viksit Bharat (Developed India) ha u snem 2047, ka jingïalehkai kan ïeng kum u mawjam ba kongsan jong ka jingtei ïa ka Ri bad ka jingpynkupbor ïa ki samla.”
U Sanket Ray, President, Coca-Cola India bad Southwest Asia, u la ong, “Ka jingïalehkai ha India ka dang rung ha ka por kaba biang bha, ha kaba la pynpaw da ka jingïashim bynta kaba kham heh, ki jingtei kiba kham khlaiñ, bad ka jingïadei kaba nangroi ha ka pyrthei. Kane ka jingkiew ka la wan urlong da ka jingïalam ka sorkar, kiba pynkhlaiñ ïa ka jingthmu, ki jingdonkam, bad ki jingïadei ha kylleng ka Ri. Ka jingïatreilang kaba la slem jong ngi bad ka FIFA ka pynlah ïa ngi ban wanrah ïa kum kane ka dak ha ka jingïalehkai bad ka khyllipmat kaba kham jan bad ki nongthied nongpet ha India.”
Ka FIFA World Cup Trophy Tour da ka Coca-Cola ka dei kaba la tei halor kawei na ki jingïatreilang kaba la slem tam ha ka Pyrthei īalehkai, ha kaba ka Coca-Cola bad ka FIFA ki la ïatreilang palat 50 snem. Ha ka jingïaid lynti sha kylleng ki jaka, ka Trophy kan leit jngoh ïa ki 30 tylli ki seng dkhot jong ka FIFA (ki Ri) ha ki 75 tylli ki jaka sangeh bad palat 150 tylli ki sngi jngoh kai, kiba ai ïa ki nongkyrshan ka lad kaba phylla kaba ki lah ban mad ïa ka jingkmen bad jingïadei jong ka phutbol.
Ka Trophy FIFA World Cup kaba sdang nyngkong eh la shna da ka ksiar 18 carat, kaba khia 6.175 kg, kaba la thaw kum ka jingpynlong jong ar tylli ki dur briew kiba bat ïa ka dur pyrthei halor jong ki. Ka jingpynwandur ka dei naduh u snem 1974. Ka FIFA World Cup Trophy Tour ka pynpaw ïa ka jingaiti jong ka Coca-Cola ha ki por ïalehkai ha ka pyrthei ban rakhe ïa ka jingïalehkai kaba jylliew ha ka kolshor phutbol ba don tynrai ha kylleng ka ri.
Da kaba neh ha ka rukom treikam jong ka kaba buh nyngkong ïa ka imlang sahlang, ka Coca-Cola India ka la pynïasoh ia ka jingthmu jong ka #MaidaanSaaf ha ka Trophy Tour. Da kaba pynkylla dur, ki nongtrei ba tbit bad ka jingpynīaid kaba shai ha madan, ka jingthmu kaba pynlah ban lum bad pynīakhlad ïa ki jaboh, kaba kyrshan ïa ka rukom lum jakhlia da ka jingkitkhlieh haba don ki jingïalang kiba heh.
