Tura, Risaw 23: Ka tnad pule puthi, sorkar Meghalaya kala dep pynlong iaka prokram jong ka SPARK Meghalaya, kaba mut ka School Programmes in Articulation, Resilience and Kindness – State Summit ’26, mynta ha District Auditorium, Tura kaba la plie pyrda da u Myntri Rangbah ka jylla Meghalaya, u Conrad K. Sangma, kum u kongsan.
La don lang ruh ki heh sorkar na ki bor ba dei peit jong ka distrik, ki heh nongtrei jong ka tnad pule puthi, dkhot jong ki nongbishar, principal, nonghikai bad ki samla pule bad ki samla na ki distrik bapher bapher bad ki skul jong ka jylla Meghalaya.
Ha katei ka jingialang, u Conrad u la ong ba ka long ka jingshem ba sngewtynnad jong u ban don lang bad ki samla pule bad u la kynmaw iaka jingialang jong ka State Summit ha ka nongbah Shillong kaba sngewtynnad bad u la pyntip iaka kynhun SPARK ba ia kane ka jingialang, yn pynlong ha Tura mynta u snem da kaba ong ba ka daw ka long kaba kongsan na ka bynta ki samla ba kin sam bad shem iaka jing riewspah ka jylla ha ka rukom im, ka ktien ka thylliej, ka khyndew ka shyiap, ka jingitynnat, ka bam ka dih bad ka jingshad jingkmen. Ka jingleit bad ka jingshong sah ki long ka bynta jong ka jingkynduh kaba kin kynmaw sah.
U la ong ba u la sngew kmen ban iohsngew ba bun ki khynnah pule kila dep leit sha Tura ha ka sien ba nyngkong bad kane ka jingialang ka ai la lad kabu ksiar iaki samla ban iakren, kynduh bad sngewthuh iaki kolshor bapher bapher bad ki jingmut jong ki paidbah.
Haba pynpaw halor ki thong kiba iadei bad ki samla da ka sorkar, u la kdew ba lyngba ka MGMP, 8,000 ngut ki nongrwai jingsneng mynta ki rwai ki tem ia kaba ki sngewtynnad, ‘ki kamai bad ki pynlut biang’ da kaba pyni iaki sap lah ban pynlong palat 20,000 tylli ki lympung rwai lane tem ha kylleng ka jylla, ka ri bad ka pyrthei ryngkat ka jingkyrshan ka sorkar kaba la pynlong iaki nongrwai jingsneng ban pyni iaki sap haduh ha Japan bad Germany bad u la pyntip ruh shaphang ka CM Elevate program bad ki jingpynlut tyngka ha ka sector Sports.
Da kaba ai khublei iaki tnad pule puthi u la pyntip ba bun ki prokram jong ka jylla Meghalaya la long ha ki bynta ba hapoh ka jylla bad u la ong ba lada pynlut pisa ha kum kine ki prokram kam dei ba shu pynlut kai iaka pisa hynrei ka long ka jingiarap ban bei tyngka kaba long ka jingbha iaki pateng ban wan.
Ha katei ka jingialang, la don ka jingpyllait iaka SPARK Outcomes Report 2026, ki jingshad tynrai bad kiwei kiwei da ki khynnah pule bad ki nonghikai bad ka jing pynkup burom iaki khlur jong ka District SPARK Stars.
